La Voie de Paradis

Mi marz, tout droit en cel termine Que desouz terre ist la vermine, Où ele a tout l’yver esté, Si s’esjoït contre l’esté ; Cil arbre se cuevrent de fueille Et de flor la terre s’orgueille, Si se cuevre de flors diverses, D’indes, de jaunes et de perses ; Li preudon, quant voit le jor né, Reva arer en son jorné ; Après arer son jorné same. Qui lors semeroit si que s’âme Moissonnast semence devine, Je di por voir, non pas devine, Que buer seroit nez de sa mère, Quar tel moisson n’est pas amère. Au point du jor c’on entre en oevre Rustebuef, qui rudement oevre, Quar rudes est, ce est la somme, Fu aussi com du premier somme. Or sachiez que guères ne pensse Où sera prise sa despensse. En dormant .i. songe sonja : Or entendez dont qu’il sonja, Que pas du songe ne bordon. En sonjant, escharpe et bordon Prist Rustebues, issi s’esmuet : Or chemine, si ne se muet. Quant la gent de moi dessambla, Vers paradis, ce me sambla, Atornai mon pelérinage. Des ostes que j’oi au passage Vous vueil conter et de ma voie ; N’a guères que riens n’en savoie : J’entrai en une voie estroite ; Moult i trovai de gent destroite Qui à aler s’i atornoient ; Mes trop en vi qui retornoient, Por la voie qui estoit male. Tant vous di n’i a pas grant ale, Mès mendre que je ne créusse. Ainz que guères alé éusse Trovai .i. chemin à senestre : Je vous déisse de son estre Se je n’éusse tant afère ; Mès la gent qui du mien repère Va celui si grant aléure Com palefroiz va l’ambléure. Li chemins est biaus et plesanz, Délitables et aaisanz : Chascuns i a à sa devise Quanques soihaite ne devise ; Tant est plesanz chascuns le va, Mès de fort eure se leva Qui le va se il n’en repère. Li chemins va à .i. repère Où trop a dolor et destrece ; Larges est, mès toz jors estrece. Li pélerin ne sont pas sage : Passer lor estuet .i. passage Dont jà nus ne resortira. Or sachiez qu’au resortir a Une gent male et félonesse Qui por loier ne por promesse N’en lessent .i. seul eschaper Puis qu’il le puissent atraper. Cel chemin ne voil pas tenir, Trop me fust tart à revenir. Le chemin ting à destre main ; Je, qui n’ai pas non d’estre main Levez, jui la première nuit, Por ce que mes contes n’anuit, A la cité de Pénitance : Moult oi cel soir povre pitance. Quant je fui entrez en la vile, Ne cuidiez pas que ce soit guile, Uns preudom qui venir me vit, Que Diex conseut se encor vit, Et s’il est mors Diex en ait l’âme, Me prist par la main, et sa fame Me dist : « Pélerins, bien veigniez. » Léenz trovai bien enseigniez La mesnie de la meson, Et plains de sens et de reson. Quant je fui en l’ostel, mon oste Mon bordon et m’escharpe m’oste Il méismes, sanz autre querre ; Puis me demande de ma terre Et du chemin qu’alé avoie. Je l’en dis ce que j’en savoie. Tant l’en dis-je, bien m’en souvient : « Se tel voie aler me covient Com j’ai la première jornée, Je crierai la retornée. » Li preudom me dist : « Biaus amis, Cil sires Diex, qui vous a mis El cuer de fère cest voiage, Vous aidera au mal passage. Aidiez cels que vous troverez, Conseilliez cels que vous verrez Qui requerront vostre conseil, Ce vous lo-ge bien et conseil. » Encor me dist icil preudon Se je fesoie mon preu don Orroie-je le Dieu servise ; Quar trop petit en apetise La jornée c’on a à fere. Je le vi douz et debonère, Si m’abelirent ses paroles, Qui ne furent vaines ne voles. Quant il m’ot tout ce commandé, Je li ai après demandé Qu’il me dist par amistié Son non. « J’ai non, dist-il, Pitié. » — « Pitié ? dis-je, c’est trop biau non. » — « Voire, fet-il ; mès le renon Est petiz ; toz jors amenuise. Ne truis nului qui ne me nuise ; Dame Avarice et dame Envie Se duelent moult quant sui en vie, Et Vaine-Gloire me r’amort, Que ne désirre que ma mort ; Et ma fame a non Charité. Or vous ai dit la vérité, Mais de ce sommes mal bailli, Que sovent sommes assailli D’Orgueil, le gendre Félonie, Qui nous fet trop grant vilonie. Cil nous assaut et nuit et jor : Li siens assaus est sanz séjor. « De cels que je vous ai conté, Où il n’a amor ne bonté, Vous gardez, je le vous commant. » — « Ha Diex ! ostes, et je commant ? Ainz ne les vi ne ne connui. Si me porront bien faire anui : Jà ne saurai qui ce fera. Ha Diex ! et qui m’enseignera Comment je les eschiverai ? » — « Ostes, je vous enseignerai Lor connoissance et lor meson ; S’il a en vous sens ne reson, Que moult bien les eschiverez. Or escoutez comment irez Jusque la meson de Confesse, Qui la voie est .i. poi engresse, Et s’est assez mal à tenir Ainçois c’on i puist avenir. « Quant vous cheminerez demain, Si verrez à senestre main Une meson moult orguilleuse ; Bele est, mès ele est péreilleuse, Qu’ele chiet par .i. pou devant. Moult est bien fete par devant, Assez miex que n’est par derrière, Et s’a escrit en la mesière : « Céenz est à Orguex li cointes, « Qu’à toz péchiez est bien acointes. » Cil granz sires dont je vous conte A moult souvent et duel et honte Par sa manière qui est fole, Et par sa diverse parole, Où il n’a ne sens ne savoir, Et s’en porte cors et avoir. Sa meson que je vous devise A-il par son beubant assise Sor .i. turet enmi la voie, Por ce que chascuns miex la voie Moult a ostes en son ostel, Qu’il a ostez d’autrui ostel Qui fesoient autrui ouvraingne, Qui auroient honte et vergoingne Qui de ce lor feroit reproche ; Mès li termes vient et aproche Que Fortune, qui met et oste, Les ostera de chiés tel oste. « Sire Orguex lor promet l’avoir, Mès n’ont pas plèges de l’avoir. Si vous dirai que il en fait Par parole non pas par fet : Il fet du clerc archediacre Et du grant-doien souz-diacre ; Du lai fet provost ou bailli, Mès en la fin sont mal bailli, Que vous véez avenir puis Qu’il chiéent en si parfont puis, Par Dieu le père esperitable, Por du pain curent une estable. « Icele gent que je vous nomme Que Orguex essauce et assomme, Sont vestus d’un cendal vermeil Qui destaint contre le soleil ; Chapelez ont de flor vermeille Qui trop est bele à grant merveille Quant ele est freschement cueillie ; Mès quant li chauz l’a acueillie Tost est morte, matie et mate : Tel marchié prent qui tel l’achate. « Desouz Orgueil, .i. poi aval, A l’avaler d’un petit val, A Avarisce son manoir, Et si sont tuit si homme noir, Non pas très noir, mès maigre et pâle, Por lor dame qui est trop male. Ausi les tient comme en prison, Mès de ce fet grant mesprison Qu’à nului nule bonté n’offre. Enmi sa sale sus .i. coffre Est assise mate et pensive ; Miex samble estre morte que vive ; Jà ne sera sa borse ouverte, Et si est sa meson couverte D’une grant pierre d’aymant ; Li mur entor sont à cimant : Moult est bien fermez li porpris. Cil se doit bien tenir por pris Qui vient en icele porprise, Quar el porpris a tel porprise Qu’ele n’est fete que por prendre. Grant espace li fist porprendre Cil qui n’i fist c’une huisserie, Qui à l’issir est briserie. Si souef clot, si souef oevre, C’on ne voit guères de tel oevre. « Après Avarisce la dame Esta une vilaine fame Et ireuse : s’a à non Ire. Or vous vueil sa manière dire : Ire, qui est male et vilaine, Ne set pas tant descharpir laine Comme ele set de cheveus rompre ; Tout ront quanqu’ele puet arompre ; Tant a corouz, tant a dolor Qui tant li fet muer color, Que toz jors sont ses denz serrées, Qui jà ne seront desserrées Se n’est por félonie dire ; Car tels est la manière d’Ire, Que ne li lest les denz estraindre Et souspirer et parfont plaindre, Et coroucier à lui-méisme, Et ce toz jors li regaïsme ; Jà ne querroit por nule chose. Tel manière a que toz jors chose : Fols est qui en chiés li ira. Tele manière en Ire a Qu’ele se veult à chascun prendre De ce vous vueil-je bien aprendre. Par ceste reson entendez, Vous qui la voie demandez Por aler à Confession, Que nus ne doit en sa meson Nul hom receter ne enbatre, S’il ne veult tencier ou combatre. Or oiez de son habitacle, Où Diex ne fet point de miracle. « Du fondement de la meson Vous di, que tel ne vit mès hom. I. mur i a de félonie Tout destempré à vilonie ; Li sueil sont de désespérance Et li pommel de meschéance ; Li torchéis est de haïne. D’autre chose que de faïne Fu cele meson enpalée, Quar l’eudure fu engelée. Si en a esté coroucie Quant sa meson est depecie. De tristece est l’empaléure : Passez outre grant aléure, Quar ce ne vous porroit aidier ; Qui n’aime rancune et plaidier, Je ne lo pas que s’i estoise, Quar preudom n’a cure de noise. Por ce que tu ne t’i arrives, Li braz, les laz et les solives Et les chevilles et li tré Sont, par saint Blanchart de Vitré, D’un fust ; s’a non Dures-noveles ; Et de ce resont les asseles ; Li chevron sont d’autre mesrien, Mès tel merrien ne vaut mès rien, Quar il est de mésavanture : S’en est la meson plus obscure. Là ne vont que li forsené Qui ne sont pas bien assené. « El fons d’une obscure valée Dont la clartez s’en est alée, S’est Envie reposée et mise. Deviser vous vueil sa devise : Ne sai s’onc nus la devisa, Mès bien sai que pâle vis a, Car el lit où ele se couche N’a-il ne chaelit ne couche, Ainz gist en fiens et en ordure ; Moult a duré et encor dure : N’i a fenestre ne verrière Qui rende clarté ne lumière, Ainz est la meson si obscure C’on n’i verra jà soleil luire. Ovides raconte en son livre, Quant il parole de son vivre. Qu’il dist char de serpent menjue Dont merveille est qu’il ne se tue ; Mès Rustebues à ce respont Qui la char du serpent espont C’est li venins qu’ele maintient : Ez-vous la char qu’en sa main tient. Moult a grant obscurté laienz ; J’à n’enterront clerc ne lai enz Qui jamès nul jor aient joie. Ne cuidiez pas qu’ele s’esjoie S’ele ne set qu’autres se dueille : Lors s’esjoït et lors s’orgueille Que ele ot la dure novele ; Mès lors li torne la roele, Et lors li sont li dé changié Et geu et ris bien estrangié Quant ele set autrui léesce ; Deuls l’esjoïst, joie la blesce. « Moult est s’entrée viex et sale ; Si est sa meson et sa sale Et sa valée et orde et vils. Après ces choses or devis De cels qui si fort se desvoient Quant la meson Envie voient, Que il vuelent véoir Envie, Qui ne muert pas, ainz est en vie. Quant il aprochent du repère Dont nus en santé ne repère, Lors si lor trouble la véue, Et la joie qu’il ont éue Perdent-il au passer la porte. Or savez que chascuns en porte : « Li cors où Envie s’embat Ne se solace ne esbat ; Toz jors est ses viaires pâles, Toz jors sont ses paroles males. Lors rist-il que son voisin pleure, Et lors li recort li deuls seure Quant son voisin a bien assez : Jà n’ert ses viaires lassez. Or poez-vous savoir la vie Que cil maine qui a Envie. Envie fet homme tuer, Et si fet bonnes remuer, Envie fet rooingner terre, Envie met ou siècle guerre, Envie fet mari et fame Haïr, Envie destruit âme, Envie met descorde ès frères, Envie fet haïr les mères, Envie destruit gentillece, Envie griève, Envie blece, Envie confont charité Et si destruit humilité. Ne sai que plus briefment vous die Tuit li mal vienent par Envie. « Accide, qui sa teste cuevre, Qu’ele n’a cure de fère œvre Qu’à Dieu plaise n’à saint qu’il ait, Por ce que trop li seroit lait Qui li verroit bon œvre fère, Lez Envie a mis son repère. Or escoutez de la mauvaise, Qui jamès n’aura bien ne aise : Si vous conterai de sa vie Dont nul preudomme n’ont envie. « Accide, la tante Parece, Qui trop pou en estant se drece Poi ou noient puis qu’il coviegne Qu’ele face bone besoingne, Voudroit bien que clerc et provoire Fussent à marchié ou à foire, Si c’on ne féist jà servise En chapele ne en église ; Quar qui voudra de li joïr Ne sa bele parole oïr Ne parolt de saint ne de sainte, Qu’ele est de tel corroie çainte, S’ele va droit, maintenant cloche Que ele ot clocheter la cloche ; Lors voudroit bien que li batiaus Et li coivres et li métaus Fussent encor tuit à refondre. La riens qui plus la puet confondre, Qui plus li anuie et li griève, C’est ce quant delez li se liève Aucuns por aler au moustier, Et dist : « Vous i fustes moult ier : Qu’alez-vous querre si souvent ? Lessiez i aler le couvent De Pruilli ou d’autre abéie. » Issi remaint toute esbahie : Encor a-ele tel manière Que jà ne fera bele chière Por qu’ele voie les denz muevre, Tant fort redoute la bone œvre. Que vous iroie-je aloingnant Ne mes paroles porloingnant ? Quanques Diex aime li anuie Et li est plus amer que suie. « Gloutonie, la suer Outrage, Qui n’est ne cortoise ne sage, Qui n’aime reson ne mesure, Refet sovent le mortier bruire, Et chiés Hasart le tavernier, Et si fu en la taverne ier Autant com i a hui esté : Ce ne faut yver ne esté. Quant ele se liève au matin, Jà en romanz ne en latin Ne quiert oïr que boule et feste. Du soir li refet mal la teste, Or est tout au recommancier. Assez aime miex Monpancier Que Marseille ne Carlion. Por ce vous di-je quar li hon Qui est ses kex a assez paine : Xiiij. foiz en la semaine Demande bien son estovoir, Mès il covient chiés li plovoir Se tant avient que aus chans plueve, Que sa mesons n’est mie nueve Ainz est par les paroiz ouverte Et par deseure descouverte. Or sachiez que mauvès mestre a ; Jamès plus mauvès ne nestra. Si herberge-ele mainte gent, El leu qu’el n’a ne bel ne gent ; Bediaus et bailliz et borgois, Qui .iij. semaines por .i. mois Lessent aler à pou de conte ; Por ce que de l’ourer ont honte Sont en cel recet receté ; Tant i sont qu’il sont endété Et créance lor est faillie. Lors est la dame mal baillie, Quar ses ostes li covient perdre ; Si ne s’en set à cui aerdre, Aus chanoines des granz églises, Por ce que grans est li servises Si s’en descombrent en contant. Que vous diroie ? il sont tant Que clerc, que chanoine, que lai Trop i feroie grant délai. Luxure, qui les fols desrobe, Qu’au fol ne lest chape ne robe, Qui mainte gent a jà honie, Est bien voisine Gloutonie ; Ne faut fors avaler le val. Tels entre chiés li à cheval Qui s’en revient nuz et deschaus. Trop est vilains ses seneschaus : Tout prent, tout robe, tout pelice : Ne lest peliçon ne pelice ; Des maus qu’el’ fet ne sai le nombre ; La somme en est en une essombre, En une reculée obscure. Onques nus preudon n’en ot cure D’entrer laians por l’obscurté, Qu’il n’i a point de séurté. Nus n’i va ne riant ne baut, Tant soit ne garçon ne ribaut, Qui corouciez ne s’en reviegne ; Et ceste reson nous enseigne Que nus hon ne s’i doit enbatre Por solacier ne por esbatre. Cil dient qui i ont esté Que la meson est en esté Tel’ que de glay glagié à point, Jons ne mentastre n’i a point, Ainz est la glagéure estrange ; Si a non Folie et Losange. La dame est moult plaine d’orgueil Li portiers a non Bel-Acueil : Bel-Acueil, qui garde la porte ; Connoist bien celui qui aporte ; A celui met lez bras au col Quar bien set afoler le fol. Cil qui i va à borse vuide Est bien fols se trover i cuide Biau geu, biau ris ne bele chière : De vuide main vuide proière, Quar vous oez dire à la gent : « A l’uis, à l’uis qui n’a argent. » Luxure, qui est si grant dame, Qui bien destruit le cors et l’âme, Prent bien le loier de son oste ; Le cors destruit, la richece oste, Et quant ele a si tout osté, S’oste l’oste de son osté. En toz mauvès esforz s’esforce, L’âme ocist et s’en tret la force. Après tout ce fiert si el maigre, Les iex trouble, la voiz fait aigre. Ci a felonesse espousée : Sa chamberière a non Rousée, Et ses chambellenz Faus-s’i-fie, Or ne sai que ce sénéfie, Quar tant de gent la vont véoir Qu’à granz paines ont où seoir : Li .i. s’en vont, li autre vienent, Li revenant por fol se tienent. « Biaus douz ostes, ce dist Pitié, Bien vous devroie avoir gitié D’aler aus leus que je vous nomme, C’or véez-vous, ce est la somme, Que nus n’i vit en son aage : Si lest-ont l’âme de paiage. De l’autre voie vous devise, Qui trop est bele à grant devise Et trop plesant qui en a cure ; Et s’est assez la plus obscure, La droite voie, le droit chemin Aussi plain com .i. parchemin Por aler à confesse droit. Or vous vueil-je dire orendroit Les destroiz qui sont dusque là : Si lais la voie par delà. « A destre main, vers oriant, Verrez une meson riant, C’est à dire de bon afère. Humilitez la débonère Esta léenz, n’en doutez mie. Raconter vous vueil de sa vie : Ne cuidiez pas que je vous mante, Ne por ce qu’ele soit ma tante Vous en die ce que j’en sai, C’onques por ce ne l’ me penssai. « Dame Humilitez la cortoise, Qui n’est vilaine ne bufoise, Mès douce, debonère et franche, A vestu une cote blanche Qui n’est pas de blanc de Nicole, Ainçois vous di à brief parole Que li dras a non Bon-Éur. Nus n’est en chiés li asséur, Quar Dans Orguex li outrageus N’i a pas pris la guerre à geus : Soventes foiz assaut li livre ; Or oiez comment se délivre Et escoutez en quel manière : S’ele rist et fet bele chière, Et fet samblant riens ne li griève, Ce c’Orguex contre li se liève. Lors acore de duel et d’ire Orguex si qu’il ne puet mot dire. A tant s’en part, ne parle puis ; Maz et confus ferme son huis : Lors qui veut avoir pais, si l’a ; Qui ne veut, si va par-delà. Or vous dirai de son ostel, Onques nus riches hon n’ot tel. Li fondemenz est de concorde ; La dame de Miséricorde I estoit quant ele acorda Le descort qu’Adans descorda, Et qui nous a toz acordé A l’acort au digne cors Dé, Qui a, si com nous recordons, En sa corde les .iij. cordons. C’est la Trinité toute entière : Cil sainz arbres et cele ente ière En chiés Humilité la sage Quant Diex prist en li herbrégage. Lors porta l’ente fleur et fruit Qui puis lessa enfer destruit. Li sueil i sont de pascience : Sages hom et de grant science Fu cil qui ouvra tel ouvraingne. La meson siet en une plaingne : Si sont les paroiz d’amistié. N’i esta pas de la moitié Tant gent comme il i soloit estre, Ainz vont le chemin à senestre. Post et chevron et tref ensamble, Si com je cuit et il me samble, Sont d’une ouvrangne moult jolive. Si apele-on le fust olive ; Por ce le fist, je vous afie, Que pais et amor sénefie. La couverture atout les lates, Et li chevron et les chanlates Sont fetes de bone-aventure : S’en est la meson plus séure. En la meson a .vi. verrières, Iij. par devant et .iij. derrières ; Les .ij. en sont, se Diex me gart, D’une œvre, s’a non Douz-regart. Les .ij. méismes sont de grâce Plus luisanz que cristaus ne glace ; Les .ij. autres, si com je croi, Sont de léauté et de foi, Mès ces .ij. sont pieça brisiées Et fendues et esfrisiées. Moult par fust bele la meson Se il i reperast mès hon, Mès tel gent i ont repairié Qui se sont mis en autre airié. « Biaus oste, Larguece, ma nièce, Qui a langui si longue pièce Que je croi bien qu’ele soit morte, Verrez à l’entrer de la porte ; S’ele puet parler ne véoir, Si vous fera lez li séoir ; Quar plus volontiers se gaimante, Sachiez, qu’ele ne rist ne chante. N’a en l’ostel homme ne fame Qui gart ne l’ostel ne la dame, Fors Gentillece et Cortoisie ; Et cil ont mès si corte vie Que ne gart l’eure que tout muire. Qui orroit une beste muire S’en auroit-il au cuer mésaise. Biaus douz oste, ne vous desplaise, Alez-i, se’s réconfortez, Quar trop est li lieus amortez. Prenez en gré se pou avez ; Se cest proverbe ne savez Je vueil que l’aprenez à mi : L’en doit penre chiés son ami Poi ou auques, ce c’on i trueve ; Qu’amis est, au besoing le trueve. Mainte gent s’en sont départi Qui du leur i ont departi Çà en arrière une partie. Or est la chose mal partie, Quar la mort, qui les biens départ, Les a départiz d’autre part. « Hostes, jà ne vous quier celer, Là se soloient osteler Empereor et roi et conte Et cil autre dont l’en vous conte Qui d’amors ont chançon chanté ; Mès Avarisce a enchanté Si les chenuz et les ferranz Et toz les bachelers erranz, Et chanoines et moines noirs Que toz est gastés li manoirs. L’en soloit par amors amer, L’en soloit trésors entamer, L’en soloit doner et prometre : Or ne s’en veut nus entremetre. Voirs est qu’Amors ne vaut mès riens : Amors est mès de viez mesrien. Amors est mès à mains amère, Se la borse n’est dame et mère. Amors estoit sa chambellaine, Qui n’estoit fole ne vilaine ; Larguesce muert et Amors change, L’une est mès trop à l’autre estrange, Quar l’en dit et bien l’ai apris : « Tant as, tant vaus, et tant te pris. » « Débonèretez, qui jadis Avoit les ostes .x. et .x. Et .xix. et ,xix., N’est prisié vaillant .i. oef ; Quar bien a .lx. et .x. anz, Se Rustebues est voir disanz, Qu’ele prist à Envie guerre, Qui or est dame de la terre. Envie, qui plus ot mesnie, A la querele desresnie. Si a régné dès lors et règne Et régnera et encor régne : Jamès à régner ne fin’ra ; Mès se jamais en la fin r’a Débonèreté en prison, Sanz mesfet et sanz mesprison Croi-je que tenir la voudra : Ce ne sai-je s’ele pourra. Franchise me dist l’autre jor, Qui en meson ert à séjor, Que Débonèreté n’avoit Recet, ne homme ne savoit Qui se meslast de son afère Ne qui point amast son repère. Or a tel honte qu’il ne s’ose Monstrer aus genz por nule chose ; Quar, bien savez, c’est la coustume Qu’au-desouz est chascuns le plume. Biaus douz ostes, ce dist Pitiez, Gardez onques ne despisiez Vostre ostesse quant la verrez, Mès d’une chose me créez, Que tels fet feste et va tripant Qui ne set pas qu’à l’ueil li pant. « Ostel troverez povre et gaste, Qu’il n’a léenz ne pain ne paste. Bien sai que poi i dormirez : Savez por qoi vous ne porrez, Quar qui a conpaignie aprise Bien sai de voir que petit prise L’aise qu’il a sanz conpaignie ; Nequedent aise n’est ce mie. Ostes, dites-li de par moi Ne s’esmait ne que je n’esmoi, Quar je sai bien que tost faudra : Jà nule rien ne nous vaudra Fors que l’amor de Jhésu-Crist : Ce trovons-nous bien en escrit. » Dist Pitiez : « Charitez, ma fame, Qui a esté si vaillant dame, Est bien près voisine celui Qui tant a afère de lui, Qui a non Debonereté, Qui chièrement a achaté Les enviaus aus envieus Et les maus aus malicieus. Nostre ostel verrez bel et cointe, Mès mainte gent s’en désacointe : Qu’au soir i vient, s’en va au main ; François sont devenu Romain Et li riche homme aver et chiche. Cil sont preudomme qui sont riche ; A cels met-on les braz aus cols : Li povres hom est li droiz fols. Et bien sachiez en vérité Que se il aime Charité L’en dira : « C’est par sa folie Et par sa grant mélancolie Qui li est entrée en la teste. » Ice me fet perdre la feste Et le solaz que g’i avoie. Nus n’i veut mès tenir la voie, Fors li moine de Saint-Victor, Quar je vous di nus ne vit or Si preude gent, c’est sanz doutance. Ne font pas lor Dieu de lor pance Comme li autre moine font A cui toz biens déchiet et font. Ce sont cil qui l’ostel maintienent, Ce sont cil qui en lor main tienent Charité et Miséricorde, Si com lor oevre me recorde. Encor raconte li escriz Que Charitez c’est Jhésu-Criz, Por ce dient maintes et maint Que cil qui en Charité maint Il maint en Dieu et Diex en lui. Charitez n’espargne nului, Por ce si me merveil moult fort C’on ne li fet autre confort : Nus n’i va iriez n’à mal aise Que la meson tant ne li plaise Que toute rancune là pert : Ce poez véoir en apert. Por ce lo que vous i ailliez, Que se vous estes traveilliez, Léenz reposer vous porrez Et tant estre com vous voudrez. Nous voudrions, por vous esbatre, Por .i. jor vous i fussiez .iiij. Tant vous verrions volentiers ; Et bien sachiez que li sentiers I fut moult plus batuz jadis De cels c’or sont en paradis. « Prouesce, qui des ciex abonde, Qui n’est pas en servir le monde, Mès en cel Seignor honorer Que toz li mons doit aorer, A dès or mès mestier d’aïde ; Quar je vous di que dame Accide, Qu’à toz preudommes doit puir, L’en cuide bien fère fuir. Moult i a jà des siens lassez : L’uns est bleciez, l’autre quassez ; Li autres par sa lécherie Est entrez en l’enfermerie Por le cors esbatre et déduire ; Li autre doutent la froidure ; A l’autre trop forment renuit Ce que il veilla l’autre nuit ; Si doute du cors enmaigrir. Itels genz si font enaigrir Le chant de Dieu et les chançons ; Il aiment miex les eschançons Et les kex et les bouteilliers Que les chanters ne les veilliers. « Je ne vous oste de la riègle Ne cels d’ordre ne cels du siècle ; Tuit ont à bien fère lessié, Et s’en fuient col eslessié Tant que la mort lor tolt les cors. Or n’a la dame nul secors, Et ele si voudroit veillier, Et jeuner et traveillier, Et escouter le Dieu servise ; Mès orendroit nus ne s’avise A fère ce qu’ele commande, Quar nus envers li ne s’amande, Fors une gent qui est venue Qui dient qu’il l’ont retenue ; Et cil sont de sas ensachié, Et dient que il ont sachié Lor ordre des fez aus apostres. Por lor mesfez et por les nostres Dient-il bien tout sanz doutance Que il font autel pénitance Com Diex et si apostre firent ; Ce ne sai-je se il empirent Et s’il feront si com maint autre Qui soloient gésir en piautre ; Or demandent à briez paroles Les bons vins et les coutes moles, Et ont en leu d’Umilité Pris Orgueil et Iniquité. « Abstinence, la suer Reson, Est presque seule en sa meson Qui tant est délitable et bele ; Si n’est pas en orde ruele, Ainz la porrez véoir à plain. Or n’i sont mès li dois si plain De gent comme il soloient estre : Or vous vueil dire de son estre : Toz les .vii. jors de la semaine Est vendrediz ou quarantaine Léenz, ce vous faz asavoir ; Et se n’i puet-on pas avoir Tel chose a l’en en la taverne. Por ce dit l’en qu’assez espergne De bien li preudom qui ne l’a, Qui Abstinance l’apela ; Je di qu’il la baptisa bel, Quar ne fu puis le tens Abel Meson si bele ne si nete : Meson fu, or est mesonete ; Consirrers en fu charpentiers ; Bien fu ses cuers fins et entiers A la meson fonder et fère. Moult est li leus de bel afère Et moult i dure grant termine Cil qui léenz sa vie fine. « Li preudomme, li ancien Ont léenz .i. fusicien Qui tant par est de franche orine Qu’il garist sanz véoir orine ; C’est Diex, qui fisique set toute, Qui moult aime la gent sanz doute Qui repèrent chiés Abstinance, Quar moult en ist bele semance. « Chastée la nete, la pure, Qui sanz péchié et sanz ordure A esté et est et sera, Se Dieu plest, vous convoiera Tant que vous verrez la cité ; Et si sachiez bien c’une ité Comme ele est ne verrez jamais ; Ainçois que soit toz passez mays La porrez-vous véoir assez. Jamès nus n’en seroit lassez Se la cité avoit aprise ; N’est pas preudom qui la desprise, Et si n’en fet de riens acroire. Entor Pasques i est la foire ; Xl. jors devant la livrent Cil qui léenz la gent délivrent. « Je sai bien que léenz si errez Assez tels choses i verrez Dont anuiz seroit à retrère ; Et qui a grant jornée à fere Coucher doit tost et main lever, Si que mains se puisse grever. » Lonc ce que la jornée est granz, Ce soir fu moult Pitiez engranz De moi gentement osteler : Ce ne porroie-je celer. Repentance, qui tant est sainte Que l’iror Dieu en est refrainte, Me plot plus que riens à véoir, Quar il ne porroit meschéoir A homme qui esta dedenz, S’autant de langues com de denz M’avoit doné li Rois de gloire, Por raconter toute l’estoire De la cité de Repentance, Si seroie-je en doutance Que pou ou noient en déisse Ou que du tout n’i mespréisse. Quant Jhésus fu resuscitez, Lors fu fondée la citez, Le jor de Pentecouste, droit A ce point et à cel endroit Que Sainz-Esperiz vint en terre Por fère aus apostres conquerre Le pueple des Juys divers. Cele citez, ce dist li vers, Est fermée de .iiij. portes Qui ne sont esclames ne tortes ; La première a non Remembrance Et l’autre a non Bone-Espérance C’on doit avoir ou Sauvéor, Et la tierce s’a non Paor ; La quarte est fète d’Amor-fine, Et c’est cele qui s’achemine A Confesse, qui tout nétoie : Moult i a entrapeuse voie Ainçois c’on i puisse venir Qui ne met grant paine ou tenir.