Le Pet au vilain

En paradis l’espéritable Ont grant part la gent chéritable, Mais cil qu’en aus n’ont charité, Ne sens, ne bien, ne vérité, Si ont failli à cele joie, Ne ne cuit que jà nus en joie S’il n’a en li pitié humaine. Ce di-je por la gent vilaine C’onques n’amèrent clerc ne preste, Si ne cuit pas que Diex lor preste En paradis ne leu ne place. Onques à Jhésu-Christ ne place Que vilainz ait herbregerie Avoec le filz sainte Marie ; Quar il n’est reson ne droiture (Ce trovons-nous en Escriture), Paradis ne puéent avoir Por deniers ne por autre avoir ; Et à enfer r’ont-il failli, Dont li maufez sont maubailli ; Si orrez par quel mesprison Il perdirent cele prison. Jadis fu uns vilains enfers : Appareilliez estoit enfers Por l’âme au vilain recevoir ; Ice vou di-je bien de voir, Uns déables iert venuz Par qui li droiz ert maintenuz. Maintenant que léenz descent, .J. sac de cuir au cul li pent, Quar li maufez cuide sanz faille Que l’âme par le cul s’en aille. Mès li vilains, por garison, Avoit ce soir prise poison. Tant ot mangié bon buef as aus Et du cras humé qui fu chaus, Que la pance ne fu pas mole, Ainz li tent com corde à citole. N’a mais doute qu’il soit périz ; S’or puet poirre, si est gariz. A cest enfort forment s’esforce, A cest esfort met-il sa force ; Tant s’esforce, tant s’esvertue, Tant se torne, tant se remue C’uns pet en saut qui se desroie, Li sas emplist et cil le loie ; Quar li maufez por pénitance Li ot aus piez foulé la pance, Et l’en dit bien en reprovier Que trop estraindre fet chiier. Tans ala cil qu’il vint à porte Atout le pet qu’el sac enporte ; En enfer gete et sac et tout, Et li pez en sailli à bout. Estes-vous chascun des maufez Mautalentiz et eschaufez, Et maudient l’âme à vilain. Chapitre tindrent lendemain, Et s’acordent à cel accort Que jamais nus âme n’aport Qui de vilain sera issue ; Ne puet estre qu’ele ne pue. A ce s’acordèrent jadis, Qu’en enfer ne en paradis Ne puet vilains entrer sanz doute : Oï avez la reson toute. Rustebues ne set entremetre Où l’en puisse âme à vilain metre, Qu’ele a failli à ces deux raignes ; Or voist chanter avec les raines Que c’est li mieudres qu’il i voie, Ou el tiègne droite la voie, Por sa pénitence alégier, En la terre au père Audegier : C’est en la terre de Cocuce, Où Audegiers chie en s’aumuce.