Les Plaies du monde

Rimer me covient de cest monde Qui de tout bien se vuide et monde. Por ce que de tout bien se vuide Diex soloit tistre et or desvuide ; Par tens li erl faillie traime. Savez porquoi nus ne s’entr’aime ? Gent ne se vuelent entr’amer, Qu’aus cuers des genz tant entre amer, Cruauté, rancune et envie, Qu’il n’est nus hom qui soit en vie Qui ait talent d’autrui preu fère, S’en fesant n’i fet son afère. N’i vaut riens parenz ne parente : Povre parenz nus n’aparente ; Mult est parenz et pou amis. Nus n’i prent inès s’il n’i a mis ; Qui riches est s’a parenté ; Mès povres hom n’a parent té, S’il le tient plus d’une jornée, Qu’il ne plaingne la séjornée. Qui auques a, si est amez, Et qui n’a riens, s’est fols clamez. Fols est clamez cil qui n’a rien ; N’a pas vendu tout son mesrien, Ainz en a .i. sou retenu. N’est mès nus qui reveste nu, Ainçois est partout la coustume Qu’au desouz est chascuns le plume, Et le gete-on en la longaingne ; Por c’est cil fol qui ne gaaingne Et qui ne garde son gaaing, Qu’en povreté a grant mehaing. Or avez la première plaie De cest siècle sor la gent laie. La seconde n’est pas petite Qui sor la gent clergie est dite. Fors escoliers, autre clergié Sont tuit d’avarisce vergié. Plus est bons clers qui plus est riches, Et qui plus a s’est li plus chiches ; Quar il a fet à son avoir Hommage, ce vous faz savoir ; Et puisqu’il n’est sires de lui, Comment puet-il aidier nului ? Ce ne puet estre : ce me samble Que plus amasse et plus assamble Et plus li plest à regarder. Si se leroit ainsois larder Que l’on en péust bonté trère, S’on ne li fet à force fère ; Ainz lest bien aler et venir Les povres Dieu sanz souvenir. Toz jors aquiert jusqu’à la mort ; Mès quant la mort à lui s’amort, Que la mort vient qui le veut mordre, Qui de riens n’en fait à remordre, Si ne li lest pas délivrer. A autrui li covient livrer Ce qu’il a gardé longuement, Et il muert si soudainement C’on ne veut croire qu’il soit mors ; Mors est-il com vils et com ors, Et com sers à autrui chaté ; Or a ce qu’il a achaté. Son testament ont en lien Ou archediacre ou dien, Ou autre qui sont si acointe, Si n’en part puis ne chiez ne pointe : Se gent d’ordre l’ont entre mains, Et il en donent (c’est le mains), S’en donent por ce c’on le sache, Xx. paire de sollers de vache Qui ne lor coustent que .xx. sols : Or est cil sauvés et assous ! S’il a bien fet, lors si le trueve, Que dès lors est-il en l’esprueve ! Lessiez-le, ne vous en soviegne ; S’il a bien fet, bien l’en coviegne. Avoir de lonc tens amassé Ne véistes si tost passé, Quar li maufez sa part en oste Por ce qu’il a celui à oste. Cil sont parent qu’au partir pèrent : Les lasses âmes le compèrent Qui en reçoivent la justice Et li cors au jor du juise : Avoir à clers, toison à chien, Ne puéent pas venir à bien. Tout plainement droit escolier Ont plus de paine que colier Quant il sont en estrange terre, Por pris et por honor conquerre Et por honorer cors et âme, S’il n’en sovient homme ne fame. S’on lor envoie, c’est trop pou : Il leur sovient plus de saint Pou Que d’apostre de paradis ; Quar il n’ont mie .x. et .x.. Les mars d’or ne les mars d’argent : En dangier sont d’estrange gent. Cels pris, cels aim, et je si doi ; Cels doit l’en bien monstrer au doi. Qu’il sont el siècle cler semé : Si doivent estre miex amé. Chevalerie est si grant chose, Que la tierce plaie n’en ose Parler qu’ainsi com par defors ; Car tout aussi comme li ors Est li mieudres métaus c’on truise, Est-ce li puis là où l’en puise Tout sens, tout bien et toute honor : Si est droiz que je les honor ; Mès tout aussi com draperie Vaut mieux que ne fet freperie, Valurent miex cil qui jà furent De cels qui sont et il si durent ; Quar cis siècles est si changiez Que uns leus blans a toz mengiés Les chevaliers loiaus et preus : Por ce n’est mès li siècles preus.