Par ta valour et par ton maintien saige...

Par ta valour et par ton maintien saige, Par ta doulceur et trés plaisant maniere. Et les grans biens et l’amoureux langaige Qui en toy sont, tu as m’amour entiere En tout, en tout acquise en tel maniere Que sans cesser je ne pensse autre part. Adès m’est vis que devant moy te voye. Ne nulle heure le mien cuer ne s’en part. Mon doulx amy, d’autre ne me vient joye. Sy as tant fait que mon cuer, qui sauvaige D’amours estoit, et qui ne faisoit chiere D’amer Jamais, ore est ou doulx servage Du dieu d’amours, si qu’estre ne puis fiere N’a luy n’a toy, ains convient que plainiere- Ment me soye donnée sans départ A toy, amis, n’est rayson je doye Desobeïr au bien qu’il me départ. Mon doulx amy, d’autre ne me vient joye, Et puis qu’Amours, par son hault seigneurage, Veult que tous deux soions soubz sa baniere, Or lui faisons de trés bon cuer hommage Sans départir, amis, en tel manière Que soies mien, et plus ne seray liere A ton doulx vueil qui d’onneur ne se part. Aimes moy bien, car tu as l’amour moye, A toy me don, je te prens pour ma part. Mon doulx amy, d’autre ne me vient joye. Fin cuer plaisant, or soions main et tart Loyaulx amans, quant a moy je l’ottroye, Plaisant desir le me conseille a part. Mon doulx amy, d’autre ne me vient joye.