Plainte. — Des abysmes d’ennuis en l’horreur plus extresme

Des abysmes d’ennuis en l’horreur plus extresme, Sans conseil, sans confort d’autruy, ny de moy-mesme, (Car, helas ! ma douleur n’en sçauroit recevoir) Outré d’ame et de corps d’incurables atteintes, Mon cœur, qui n’en peut plus, s’ouvre en ces tristes plaintes, Puisque ma voix, Seigneur, n’en a pas le pouvoir. Ton ire en sa fureur si durement me touche, Que pour ne crier point tu m’estoupes la bouche, Et ne puis envoyer mes querelles aux cieux. Mon chef tout à la fois a tari ses fontaines ; Je n’ay pas seulement du sang dedans les veines Pour respandre à boüillons par la bouche et les yeux Tu m’as posé pour butte aux angoisses ameres, Aux malheurs, aux regrets, aux fureurs, aux miseres ; Mon mal n’est toutesfois si grand que mon erreur. Mais si, pourray-je dire en ma peine effroyable, Bien que je le reclame et doux et pitoyable, Tu me fais trop sentir les traits de ta fureur. De foiblesse et d’ennuis mon ame est esgarée, Les os percent ma peau, ma langue est ulcerée, Comme flots courroucez mes maux se vont suivans ; Pour tout nourrissement j’engloutis ma salive, Et croy que ta rigueur ne permet que je vive Que pour servir d’exemple et de crainte aux vivans. Depuis quatorze jours je n’ay clos les paupieres, Et le somme, enchanteur des peines journalieres, De sa liqueur charmée en vain me va mouillant ; Il est vray que l’effort du mal que je supporte Rend ma teste assommée, et m’assoupit de sorte Qu’on me jugeroit mort, ou tousjours sommeillant. En cest estonnement mille figures vaines, Tousjours d’effroy, de meurtre et d’horreur toutes pleines, Reveillent coup sur coup mon esprit agité ; Je resve incessamment, et ma vague pensée, Puis deçà, puis delà, sans arrest est poussée, Comme un vaisseau rompu par les vents emporté. Helas ! sois-moy propice, ô mon Dieu ! mon refuge ! Puny-moy comme pere, et non pas comme juge, Et modere un petit le martyre où je suis ; Tu ne veux point la mort du pecheur plein de vice, Mais qu’il change de vie et qu’il se convertisse ; Las ! je le veux assez, mais sans toy je ne puis. Je ressemble en mes maux au passant miserable, Que des brigans pervers la troupe impitoyable Au val de Jericho pour mort avoit laissé ; Il ne pouvoit s’aider, sa fin estoit certaine, Si le Samaritain, d’une ame toute humaine, N’eut estanché sa playe et ne l’eust redressé. Ainsi, sans toy, Seigneur, vainement je m’essaye, Donne m’en donc la force et resserre ma playe, Purge et guari mon cœur que ton ire a touché, Et que la saincte voix, qui força la nature, Arrachant le Lazare hors de la sepulture, Arrache mon esprit du tombeau de peché. Fay rentrer dans le parc ta brebis esgarée, Donne de l’eau vivante à ma bouche alterée, Chasse l’ombre de mort qui volle autour de moy, Tu me vois nu de tout, sinon de vitupere ; Je suis l’enfant prodigue, embrasse-moy, mon pere ! Je le confesse, helas ! j’ay peché devant toy. Pourquoy se fust offert soy-mesme en sacrifice Ton enfant bien-aimé, Christ, ma seule justice ? Pourquoy par tant d’endroits son sang eust-il versé, Sinon pour nous, pecheurs, et pour te satisfaire ? Les justes, ô Seigneur ! n’en eussent eu que faire, Et pour eux son sainct corps n’a pas esté percé. Par le fruict de sa mort j’attens vie eternelle ; Lavée en son pur sang, mon ame sera belle. Arriere, ô desespoirs ! qui m’avez transporté ! Que toute desfiance hors de moy se retire. L’œil benin du Seigneur pour moy commence à luire ; Mes soupirs à la fin ont esmeu sa bonté. Ô Dieu ! tousjours vivant, j’ay ferme confiance Qu’en l’extreme des jours, par ta toute-puissance, Ce corps couvert de terre, à ta voix se dressant, Prendra nouvelle vie et, par ta pure grace, J’auray l’heur de te voir de mes yeux face à face, Avec les bien-heureux ton sainct nom benissant.