Prière. — Las ! que feray-je ? oseray-je hausser

Las ! que feray-je ? oseray-je hausser Les yeux au ciel, pour mon cri t’adresser, Durant la peur qui mon ame environne ? Je suis confus, tout le sens me defaut, Mon œil se trouble, et mon cœur qui tressaut Me fait trembler, tant mon forfait m’estonne ! Je veux fuïr, je veux fuïr devant L’ardent courroux de ce grand Dieu vivant, Qui tient en main l’orage et la tempeste ; Car mon peché, qui le rend courroucé, Merite bien que son foudre eslancé En mille esclats me partisse la teste. Cachons-nous donc, mais où pourray-je aller, Au ciel, en l’onde, en la terre ou en l’air, Ô Seigneur Dieu, pour éviter ta face ? Si je me cache en l’obscur de la nuit, Ton œil divin par les ombres reluit, Et tout soudain remarquera ma trace. D’aller au ciel, tu es là presidant ; Il vaut donc mieux fuïr en descendant Et me musser au plus creux de la terre. Mais ce seroit redoubler mon tourment, Car aux enfers tu as commandement, Et jusques là tu me feras la guerre. Soit que je veille ou que je sois couché, Rien que je fasse, helas ! ne t’est caché ; Tu me descouvre et cognois ma pensée. Veux-je fuïr, tu me viens attraper, Et, pour courir, je ne puis eschapper Devant ta main justement courroucée. Ne pouvant donc ta fureur éviter, J’ose, ô mon Dieu ! j’ose me presenter, Palle et tremblant, à ta majesté sainte, La veuë en bas mille pleurs degoutant, L’ame debile et le cœur tout battant Dans ma poitrine horriblement attainte. Darde sur moy la fureur de ton bras, Saccage moy, fais ce que tu voudras, Lance du ciel ta flamme estincelante ; Je sçay, Seigneur, que je l’ay merité, Et plus encor pour mon iniquité, Qui sans cesser devant moy se presente. Tu peux, helas ! tu peux me foudroyer : Mais que te sert de ta main desployer Encontre moy, qui ne suis rien que poudre ? Tu es tout grand, tout juste et tout puissant ; Je ne suis rien ; et, en me punissant, Tu pers, Seigneur, et ta peine et ton foudre. Me chastiant, tu te rens poursuivant Contre un festu qui est poussé du vent ; Tu veux monstrer ta force à un ombrage, À un corps mort, à un bois desseiché, À un bouton qui languit tout panché, Et au bouillon enflé sur le rivage. Ayes pitié, ayes pitié de moy ! Tu es mon tout, mon Seigneur et mon roy ; Seul je t’invoque en ma plainte ordinaire. Souvienne toy que tu m’as façonné, D’os et de nerfs tu m’as environné ; Donc, ô mon Dieu, ne me vueilles desfaire ! Si je ne suis qu’un bourbier amassé, Tes mains pourtant, tes mains m’ont composé, Tu m’as couvert de charnure et de veines : Quand tu voudras, tu me feras dechoir Comme la fleur qui flestrit sur le soir, Et decouler comme l’eau des fontaines. Desjà, Seigneur, desjà j’ay bien senti Sur moy, chetif, ton bras appesanti ; Je n’en puis plus, tant la rigueur me presse ! Un voile obscur me va bandant les yeux, Mille remors m’agitent furieux, Et ma vigueur d’heure en heure s’abaisse. Soit que le jour se monstre en reluisant, Soit que la nuict, toute chose appaisant, Couvre la terre et guide le silence, Las ! je ne puis, je ne puis reposer ! Et ma douleur, qui ne peut s’appaiser, Redouble en force et croist sa violence. Ton trait vengeur, contre moy décoché, De son venin m’a cuit et desseiché ; Il boit mon sang, il brusle mes entrailles ; Je suis pressé par ton dur jugement D’une frayeur et d’un estonnement, Et sens au cœur mille rouges tenailles. Si quelquefois je souhaite la nuit, Pensant chasser le souci qui me suit Et la fureur de mes peines terribles, Las ! je n’ay clos les yeux pour sommeiller, Que tout tremblant il me faut reveiller, Espouventé de visions horribles. Mes tristes jours coulent legerement, Je n’atten rien qu’un obscur monument, Je ne voy rien qui ne soit effroyable ; Tout me desplaist, et suy si plein d’esmoy Que mesme, helas ! je me fasche de moy, Me cognoissant si pauvre et miserable. Ô Seigneur Dieu, qui vois ma passion, Ne me délaisse en ceste affliction ! Chasse ton ire, adoucis ton courage, Vueille en douceur ta colere changer, Tens moy la main, sauve moy du danger, Qui m’est prochain par ce cruel orage.