Prière en forme de confession

Durant tant de grands flots coup sur coup s’elevans, Tant de feux, tant d’esclairs, tant de pluye et de vents, Rebatans à l’envi ma nacelle brisée, Resté la nuict sans guide entre mille destours, Seigneur, je te reclame, et voici ton secours Qui rend de mon esprit la tourmente appaisée. Le brouillas, qui long-temps m’a le jour derobé, Percé de tes rayons en peu d’heure est tombé, Mon ame aveugle un temps la veuë a recouverte ; Mais presque elle a regret d’un bien si precieux, Car, quand dessus soy-mesme elle tourne les yeux, D’horreurs et de pechez se voit toute couverte. Las ! puisque rien d’entier ne s’y peut adviser, Que luy sert sa clarté, sinon pour l’accuser Et la rendre confuse en voyant tant de vices ? Plaise toy donc encor les deux yeux me couvrir ; Non, Seigneur, mais plustost vueille les mieux ouvrir, Pour contempler ta grace et tes grans benefices. Or’ que tout dedans moy je me suis retiré, Des rayons de ton œil en ma nuict esclairé, Que je voy de thresors dont tu m’es favorable ! N’estant, tu m’as faict estre, et m’as rendu vivant, Tu m’as pourveu des sens, et plus haut m’eslevant, Me depars le discours et me fais raisonnable. Ta main d’ame et de corps a mon tout façonné, De corps foible et mortel à la terre addonné, Qui retourne à la terre au soir de sa journée ; D’ame immortelle et vive à jamais demeurant, Tousjours, comme à son bien, vers le ciel aspirant, Si le monde abuseur ne l’en rend destournée. Oiseaux, bestes, poissons, eaux, bois, plantes et fruits, Nuict, jour, lune, soleil pour moy furent produits ; Et pour rendre ta grace en tout poinct accomplie Apres m’avoir laissé quelques jours savourer De tes fruits icy-bas, s’il te plaist m’en tirer, Tu me gardes au ciel une eternelle vie. Tant de biens, ô Seigneur ! que departent tes mains Par grace et franchement sont donnez aux humains ; Tu n’en esperes rien, tu n’as de rien affaire ; Il t’a pleu, tu l’as faict de libre volonté. Voylà ce qu’en l’esprit je voy de ta bonté, Lors que ton œil divin mes tenebres esclaire. Mais quand je me regarde au miroir de ta loy, Que dedans et dehors transformé je me voy, Que je trouve en mon ame et de crasse et d’ordure ! Que mes sens corrompus sont devenus infects, Que je m’appelle ingrat des biens que tu m’as faits, Et que mon premier estre a changé de figure ! Cest esprit que divin tu m’avois faict avoir, Pour l’elever au ciel, pour entendre et sçavoir, Et pour te recognoistre aux traits de ton ouvrage, Esgaré du sentier de sa felicité, A choisi pour le vray l’ombre et la vanité, Et luy-mesme à son bien s’est fermé le passage. Ce cœur, des chauds desirs la source et l’aliment, Que tu m’avois donné pour t’aimer ardemment, Et pour servir de livre à ta loy tres-parfaite, Ne t’a rien reservé de ses affections ; Mais, en s’abandonnant aux folles passions, À toutes les fureurs a servi de retraite. Il a souvent bouilly de rage et de dedain, Il a senti douleur du bien de son prochain, Il a long-tans couvé mainte haine immortelle, Il s’est enflé d’orgueil, il s’est desesperé ; La chaude ambition l’a souvent alteré ; Il n’a point esté simple, ains double et peu fidelle. Ces yeux, rois de mes sens, qui me devoyent guider À toute heure à mon bien et du mal me garder, Ne laissans nulle entrée aux amours insensées, Charmez d’un vain plaisir, lasches se sont rendus ; Par eux mes autres sens ont tous esté perdus, Et de mon foible cœur les desfenses forcées. Eux qui tousjours en haut devoyent estre dressez, Ont tenu leurs regards vers la terre abaissez ; Eux, qui devoyent pleurer jour et nuict mon offense, Ont pleuré, las ! hé quoy ? quelque vaine rigueur, Quelque oubly, quelque change, ou telle autre langueur, Dont le maudit Amour ses servans recompense. Mon oreille, où ta voix devoit tousjours sonner, Toute aux contes menteurs s’est voulue adonner, Ouverte aux faux rapports, fermée aux veritables ; Elle a souvent ouy ton sainct nom blasphemer, Mesdire, injurier, son prochain diffamer, Et s’est pleuë au discours des amoureuses fables. Las ! helas ! que ma bouche a failli contre toy ! Je l’avois, ô Seigneur ! pour enseigner ta loy, Et du bruit de ton nom rendre la terre pleine, Pour aider les mortels, au bien les appeller, Les retirer du mal, reprendre et consoler, Sans jamais la souiller d’une parolle vaine. Mais, au lieu d’en cueillir un fruict tant desiré, Je n’ay faict que mentir, je me suis parjuré, J’ay despité le ciel, ta gloire et tes merveilles, J’en ay flaté les grands et leurs maux desguisez ; J’ay semé la discorde, et de propos rusez J’ay souvent enchanté les credules oreilles. Bref, chacun de mes sens, tant dedans que dehors, Et chacune des parts de l’esprit et du corps N’ont plus rien qui ressemble à leur forme premiere ; Un seul trait de ta main n’est sur moy demeuré ; Je suis un monstre horrible et si defiguré, Que de peur de me voir je fuy toute lumiere. Helas ! j’ay bien raison d’estre palle et tremblant ; Ma confusion croist, mon mal va redoublant. Qui du roc de mon cœur sortira des fontaines ? Qui grossira mon chef de torrens furieux ? Qui de larges ruisseaux m’enflera les deux yeux, Pour noyer mes peschez, mon angoisse et mes peines ? Mes chants soyent convertis en longs gemissemens, En tenebres mes jours, mes plaisirs en tourmens ; Que je seme mon chef de poussiere et de cendre, Que des bons comme ingrat je sois abandonné ; La crainte et la tremeur m’ont tout environné, Et la bouche d’enfer s’ouvre à fin de me prendre. Que d’un seul en mon dueil je ne sois consolé, Car du livre de Dieu mon nom est cancelé. Monts, bois, fleuves, rochers, pleurez mon adventure ! Le portraict du Seigneur j’ay moy-mesme effacé, J’ay deslaissé mon pere et son bien despensé, Puis avec les pourceaux j’ay pris ma nourriture. Mais pourtant à mon Dieu je me veux presenter, Je veux, las ! à ses piés tout en pleurs me jeter, Poussant du fond du cœur ceste voix lamentable : « J’ay pesché devant toy, pere doux et clement ; Je m’appelle ton fils, mais c’est indignement, Mon malheur ne merite un nom si favorable. « De l’abysme où je suis à toy je vay priant ; Pardonne, à ton enfant contrit et suppliant ! Je te demande grace et fuy toute justice, Ne veuille droictement mes erreurs balancer ; Ta justice, ô Seigneur ! ne se doit exercer Que contre le mechant, qui s’obstine en son vice. « Plaise-toy de tout poinct mes pechez pardonner. » Mais ce n’est pas assez, je crains d’y retourner ; Ma foiblesse, ô Seigneur ! m’est trop et trop cogneuë Aide donc, s’il te plaist, à ma fragilité, Et puis que de la mort tu m’as ressuscité, Que mon ame au tombeau ne soit plus detenuë. Esclaire à mon esprit, et le conduis à toy, Rempli mon cœur d’amour, de confiance et de foy, De tous objets trompeurs mes yeux vueille distraire, Mon oreille à jamais soit ta voix escoutant, Ma bouche incessamment ta gloire aille chantant, Et que d’ame et de corps sans fin je te revere.