Plainte. — Quand de m’aimer vous juriez feintement

Quand de m’aimer vous juriez feintement, Avec tant d’asseurance, J’appris vos tours et mon aveuglement, Contre toute esperance. Ô la douleur dont je fus tourmenté, À si tristes nouvelles ! Tous les tyrans n’ont jamais inventé De paines si cruelles. Depuis ce tans je combas nuict et jour Le rocher de mon ame, Pour en tirer la memoire et l’amour D’une si sainte dame. J’auray du mal, mais je seray vainqueur D’une amour si parjure ; Car de mes mains j’arracheroy mon cœur, S’il souffroit cette injure. Vostre beauté m’a longuement trompé Par sa douce feintise ; Pour l’advenir si j’en suis ratrapé, N’espargnez ma sotise. Je ne croy plus vos propos discordans, Ni vos plaintes frivoles, Car les effets, qui sont trop évidans, Dementent les paroles. Ne m’alleguez qu’il falloit receler Sous une amour contrainte Nos passions, qui s’alloient reveler Sans cette heureuse fainte. Dissimuler peut passer pour raison, Quand le tans le desire ; Fausser sa foy, c’est tousjours trahison, Quoy que l’on veuille dire. Quand on divise un amour trop ardant, Il perd sa violance ; Estre aimé seul, je le nomme accidant Qui passe la substance. L’ame qui quitte un corps froid et glacé, Pour tousjours s’en destourne ; La foy de mesme au cœur qu’elle a laissé Jamais plus ne retourne. Si le sujet valloit vous abuser, J’eusse excusé ce change ; Mais nulle amour ne vous peut excuser, Tant la faute est estrange. Et toutesfois pour luy vous n’estimez Honte ny renommée, Et de mon cœur les fourneaux allumez Ne vous sont que fumée. Ô gardez bien cet amour desormais, Qui vous est tant venduë ; Mais de ma foy ne vous vantez jamais, Car vous l’avez perduë. Et n’esperez qu’à vos piés quelque jour Ma fureur me rapporte ; La jalousie est bien signe d’amour, Mais c’est d’une amour morte.