Plainte. — Seroit-il bien possible ? ô Dieu ! qu’ay-je entendu ?

Seroit-il bien possible ? ô Dieu ! qu’ay-je entendu ? Celle à qui les destins et mes yeux m’ont rendu, Qui vivoit toute en moy, dont j’estoy la pensée, Nostre amour a faussée. Ô foy ! foy, dont le nom est si grand en vertu, S’il est vray que tu sois, où te retires-tu ? Ah ! tu m’as abusé ! j’esprouve à mon dommage Que tu n’es que langage. Il n’y a dans les cœurs ny foy ny verité ; Il n’y a point de dieux, c’est un conte inventé, Et ne se trouve au ciel ny raison ny justice Pour l’humaine malice. Si les dieux estoient vrays, qu’elle a tant invoquez ! Ils ne souffriroient pas d’avoir esté mocquez, Et qu’ainsi de leur nom elle se fust servie Pour abuser ma vie. Seuls les dieux reclamez ne m’ont point abusé ; Il a fallu s’aider de maint geste embrasé ; Les pleurs y ont eu part, les soupirs et les plaintes, Et les œillades feintes. Avec tant d’ennemis qui n’eust esté donté ? Mais, ô le beau laurier qu’elle aura merité, Ayant sceu decevoir un amoureux fidelle, Qui ne croyoit qu’en elle ! Il n’estoit grand besoin de s’en travailler tant : Un seul trait de ses yeux, tous mes sens enchantant, Ne suffisoit que trop pour me forcer à croire Que la neige estoit noire. Celuy qui maintenant s’en pense estre adoré, Comment de son amour peut-il vivre asseuré, Puis qu’on ne peut trouver d’assez ferme cordage Pour une ame volage ? S’il se fie aux sermens, les sermens m’ont deceu ; S’il croit à ses regards, d’eux mon mal est issu ; S’il voit pleurer ses yeux, en nos amours premieres Ils versoient des rivieres. L’air, tant que son esprit n’est propre aux changemens ; Ce qu’elle a luy déplaist, et se sert des amans Comme l’on fait des fleurs, qui ne nous semblent belles Qu’estans toutes nouvelles. Sa parole et son cœur sont tousjours differans. C’est un astre vrayment, mais c’est des plus errans, Et la lune est tardive en sa course pressée Aupres de sa pensée. Son infidelité l’hellebore sera, Qui du cerveau troublé ma fureur chassera, Et comme un autre Achil’ guarira salutaire Le coup qu’elle a sceu faire. Qu’elle n’espere donc me pouvoir ratraper ; Deux fois un mesme lieu ne me fait point choper ; Contre tous ses attraits et sa force magique J’ay l’anneau d’Angelique.