Pour le grant bien qui en vous maint...

Pour le grant bien qui en vous maint, Bel et bon, ou mon cuer remaint, Je vueil vivre joyeusement, Car vous me donnez sentement De très grans plaisirs avoir maint. Car quant j’oy dire que l’en tient Que vostre gent corps se contient, Si haultement, en toute honnour, Que grâce et loz vous apanient Sur tous autres, bien le retient Mon cuer qui ne pourroit grigneur Joye avoir, et quant il attaint A vostre amour qui l’a attaint. C’est moult grant resjouïssement Et pour ce vit très liement Mon cuer qui d’amer ne se faint Pour le grant bien qui en vous maint. Et quant je pense et me souvient Du très grant plaisir qui me vient De vous, amis, de tous la flour, J’ay tel joye, souvent avient, Que ne scay que mon cuer devient, Tant suis prise de grant doulçour. En ce penser giette un doulz plaint Mon cuer, qui a vous se complaint, Quant vous estes trop longuement Sanz moy veoir ; car seulement L’amour de vous le mien cuei vaint, Pour le grant bien qui en vous maint.