Pour le Premier Jour de L’An

L’an, comme il a cessé, rentre au mesme voyage, Perdurable en travaux par sa fin renaissant ; Mes desirs comme luy ne vont point finissant, Et son cours violant ne leur peut faire outrage. L’an finy toute fin à mes maux puisse mettre ! L’an nouveau de mon heur soit le commencemant ! Je croy qu’il adviendra, si le cœur d’un amant Par zele et par ardeur du bien se peut promettre. Car tout ce que l’amour peut allumer de flame, Tout ce que les destins en sçauroient amasser, Tout ce qu’en entretient l’espoir et le penser, Tout autant j’en recele et conserve en mon ame. L’an desjà quatre fois a fourny sa carriere, Depuis que le beau jour de vos yeux m’esclaira ; Mais qu’il se renouvelle autant qu’il luy plaira, Je continueray ferme en ma course premiere. Il est vray qu’en quatre ans, excusez mon offance, Ainsi que des saisons les jours sont inconstans, J’avouë avoir senty maint changement de tans ; Mais la force d’Amour causoit cette inconstance. Bien souvent dans l’esprit j’ay serré maint orage, J’ay clos en mesme lieu la glace et la chaleur, J’ay voulu me tuer pour vous causer douleur, Si fort la jalousie a troublé mon courage ! Quels tonnerres d’esté furent jamais semblables ? Combien dedans le cœur ay-je senty d’hyvers ? Quel printans, quel automne, en changemens divers Peurent onc égaler mes pensers variables ? Je me suis efforcé cent fois de vous desplaire, J’ay fait mille desseins de plus ne vous aimer, Mais sans trop de rigueur on ne m’en peut blasmer ; Estre sage en aimant, Dieu ne le sçauroit faire. Amour, par tels discords, entretient sa puissance ; La longue paix le matte et le rend surmonté ; L’amant comme la mer soit tousjours agité, Puis que la Cyprienne aux flots print sa naissance. Toutesfois je connoy qu’en ma rage insensée Le transport aveugle bien souvent m’a deceu ; Je connoy que le faux pour le vray j’ay receu, Et deteste en pleurant mon offense passée. Pardonnez-moy, deesse, et, perdant la memoire De ces longues erreurs, n’y pensez nullement ; Et pour le tans suivant songeons tant seulement À combler nostre amour d’heur, de joye et de gloire. Rendons-la si parfaite, et si claire et si belle, Qu’elle serve d’exemple aux siecles à venir ; Et que l’effort des ans, au lieu de la finir, Fasse que sa memoire à jamais soit nouvelle.