Sonnet IV. — Non, non, je veux mourir plustost que d’endurer

Non, non, je veux mourir plustost que d’endurer Qu’un autre aille cueillant la moisson de ma paine ; Si parfaite beauté n’est pas une fontaine, Où chacun puisse aller pour se desalterer. Si le plus grand des dieux vouloit vous adorer, Contre luy de fureur mon ame sera plaine ; Comment donc souffriroy-je une personne humaine ? Les rois et les amans veulent seuls demeurer. Descouvrez à nos yeux quel est vostre courage, Gardant celuy des deux qui vous plaist davantage, Sans ainsi feintement l’un et l’autre abuser. J’ayme mieux n’avoir rien, que si j’estoy le maistre De la moitié d’un bien qui tout à moy doit estre : Une si belle fleur ne se peut diviser.