Sonnet LI. — L’eau tombant d’un lieu haut goute à goute a puissance

L’eau tombant d’un lieu haut goute à goute a puissance Contre les marbres durs, cavez finablement ; Et le sang du lion force le diamant, Bien qu’il face à l’enclume et au feu resistance. La flamme retenüe enfin par violance Brise la pierre vive, et rompt l’empeschement ; Les aquilons mutins, soufflans horriblement, Tombent le chesne vieux, qui fait plus de deffance. Mais moy, maudit Amour, nuict et jour soupirant, Et de mes yeux meurtris tant de larmes tirant, Tant de sang de ma playe, et de feux de mon ame ; Je ne puis amollir une dure beauté, Qui, las ! tout au contraire accroist sa cruauté Par mes pleurs, par mon sang, mes soupirs et ma flame.