Sonnet LX. — Si les pleurs que j’espans, si le triste langage

Si les pleurs que j’espans, si le triste langage, Dont la nuict et mon lict sont témoins seulemant, N’ont pouvoir d’amollir un cœur de diamant, Et ne font de pitié pallir son beau visage ; Pourquoy me reservé-je à languir davantage De Fortune et d’Amour l’horrible esbattemant ? Plustost dedans le sang noyons nostre tourmant, Et nous sacrifions à cette ame sauvage. Je l’accuse à grand tort ; car son cœur de rocher De mes poignans regrets se laisseroit toucher, Si je pouvoy me plaindre alors qu’elle est presente. Mais le son de ma voix se change en la voyant, Mon œil se rasserene et n’est plus larmoyant, Et ma langue se taist bien que mon cœur lamente.