Sonnet LXI. — Depuis deux ans entiers que j’aime une beauté

Depuis deux ans entiers que j’aime une beauté, Perle unicque du monde et sa fleur la plus belle, Trois fois tant seulement j’ay peu parler à elle ; Voyez de mon malheur l’estrange cruauté ! Encor ce doux loyer, que j’avois acheté Par tant de passions et de peine immortelle, Trois fois m’est empesché par la force cruelle Du malheur envieux, dont je suis surmonté. C’est, peut-estre, mon bien dont je n’ay connaissance ; Car, si son œil divin m’oste toute puissance, Me ravit, me transporte, et me rend furieux ; S’il fait que sans espoir mon amour continuë, Que feroient ses propos favorisez des yeux ? Helas ! pour me tuer, c’est assez de la veuë !