Sonnet LXXIV. — Celle qui de mon mal ne prend point de soucy

Celle qui de mon mal ne prend point de soucy, Comme si de ses yeux il n’avoit sa naissance, Se rit de mes douleurs, si tost que je commance À me plaindre, en pleurant, de son cœur endurcy. J’ay beau m’humilier et luy crier mercy, Mercy de l’aimer trop (car c’est ma seule offense), Elle en est plus rebelle, et se plaist que je pense Qu’un courage si fier ne peut estre adoucy. Ce n’est pas toutesfois ce qui plus me tourmente, Car sa rigueur m’est douce et mon mal me contente, Voyant mes beaux vainqueurs, ses yeux que j’aime tant. Je me plains seulement de voir que la cruelle Ne croit pas que je l’aime et m’appelle inconstant, Ou dit que mes ennuis viennent d’autres que d’elle.