Sonnet LXXVI. — Si le pasteur de Troye, éleu divinement

Si le pasteur de Troye, éleu divinement Pour juger des beautez de trois grandes deesses, Desdaigna les grandeurs, la gloire et les richesses, Pour la grecque beauté, prix de son jugement ; J’en eusse fait autant : il fist fort sagement. Car aupres de vos yeux pleins de douces richesses, Quels thresors, quels honneurs, triomphes et hautesses Pourroient mouvoir mon cœur, si ferme en vous aimant ? Puis qu’estre pris de vous apporte tant de gloire, Quel trophée assez digne orneroit la victoire Du cœur qui, bien aimant, vous pourroit conquerir ? Ô seul but de mes vœux ! ô bien que je n’espere ! L’or et les vains honneurs soient cherchez du vulgaire ; Rien ne me plaist que vous, pour vous je veux mourir.