Sonnet LXXXVIII. — Je veux jurer ces vers, qui rendront tesmoignage

Je veux jurer ces vers, qui rendront tesmoignage Ou de mon inconstance, ou de ma ferme foy, En presence d’Amour mon grand maistre et mon roy Qui peut lire en mon cœur, si traistre est mon langage : C’est qu’à vostre beauté sans plus je fais hommage, Je n’aime rien que vous, en vous seule je croy ; Vostre œil m’assujettist et me donne la loy, C’est mon heur et mon gain, ma perte et mon dommage, Si j’ay jusques icy vollagement erré, De mille traits divers à toute heure enferré, Ce sont des tours communs de l’aveugle jeunesse ; Maintenant que six ans quatre fois j’ay dressez Devers vous seulement mes pensera sont passez Et mon ame en ses maux n’implore autre deesse.