Sonnet V. — Quand du doux fruit d’Amour je me rens poursuivant

Quand du doux fruit d’Amour je me rens poursuivant, Le seul digne loyer de ma perseverance, Vous pensez m’arrester, opposant pour deffanse Je ne sçay quel honneur, qui est moins que du vant Moy, je mets simplement le plaisir en avant, Et l’heureux paradis de ceste jouyssance, Qui vous deust decharmer de la feinte apparence De ces ombres d’honneur, qui vous vont decevant. Mais parlons librement, et me dites, madame, Sentez-vous de l’honneur quelque perfection, Qui plaise au goust, au cœur, à l’esprit ou à l’ame ? C’est une vieille erreur, qui aux femmes se treuve ; Car tout ce bel honneur gist en l’opinion, Et le plaisir consiste en chose qui s’espreuve.