Sonnet XII. — Je ne veux plus penser que la fureur de Mars

Je ne veux plus penser que la fureur de Mars, Ardamment allumée au milieu de la France, Ait pouvoir desormais de me faire nuisance, Bien que je m’advanture au plus fort des hazars. Car si j’ay soustenu l’assaut de vos regars Pleins de feux, plains de traits poussez de violence, Hardy, je ne craindray qu’autre chose m’offence, Et ne douteray point les plus braves soldars. Les balles que vos yeux ont tiré dans mon ame Ont comblé mon esprit de martyre et de flame ; Mais vous m’avez blessé par un si doux effort, Que, s’ils font de tels coups en l’armée ennemie, Huguenots, tuez-moy, je vous donne ma vie ; Je ne sçauroy mourir d’une plus belle mort.