Sonnet XIII. — Pourquoy si plein d’orgueil marches-tu sur ma teste

Pourquoy si plein d’orgueil marches-tu sur ma teste, Triomphant de l’honneur qu’un autre a merité ? Tes dars tant crains au ciel ne m’ont pas surmonté, Amour, c’est une dame, et non toy qui m’arreste. Si tu veux t’honorer du prix de ma conqueste, Fay qu’elle me remette en pleine liberté, Puis pren pour m’asservir cet arc tant redouté, Qui de Jupiter mesme accoise la tempeste. Je n’ay point peur de toy, celle qui me retient Par l’effort de ses yeux ton empire maintient ; C’est elle qui te fait comme un Dieu reconnoistre. Si je t’obeïssois et t’ay craint par avant, C’estoit pour l’amour d’elle. On endure souvant D’un mauvais serviteur pour l’amour de son maistre.