Sonnet XL. — Quand premier Hippolyte eut sur moy la victoire

Quand premier Hippolyte eut sur moy la victoire, Et que j’ouvry mes yeux au jour de sa beauté, Je ne sçay qu’il m’advint, je fus si transporté, Que de moy-mesme, helas ! je perdy la memoire. Mes sens estoient ravis en l’amoureuse gloire, Et mon œil esblouy de trop grande clarté, Craignant ses chauds regards, s’abaissoit arresté Sur son beau sein d’albatre et sa gorge d’yvoire. Je senty mal et bien, chaud et froid à l’instant : J’esperay sans espoir, j’eu peur, j’osay pourtant, Et parlay dans mon cœur mainte chose inconnuë. Je le fortifiay pour les maux à venir, Et, pour mieux y penser, chassay le souvenir De toute autre beauté que devant j’avoy veuë.