Sonnet XVII. — Je voyoy foudroyer d’un effort incroyable

Je voyoy foudroyer d’un effort incroyable Les murs d’une cité que l’ennemy tenoit ; La place estoit en feu, l’air autour resonnoit. Horrible de fumée et de bruit effroyable. Le rebelle ennemy, d’un courage indomtable Canonnant, sans cesser nostre choc soustenoit ; L’un couroit à l’assaut, l’autre s’en revenoit, Remportant pour loyer une playe honorable. Or, comme je pensois estre hors du danger, Deux yeux, qu’Amour luy-mesme avoit voulu charger, Me vindrent dans le cœur mortellement attaindre. Las ! les plombs ennemis ne m’avoient point blessé ; Les balles de vos yeux sont beaucoup plus à craindre, Qui m’ont en mille endroits cruellement percé.