Sonnet XXIX. — Qui fait plainte d’Amour en doit estre ignorant

Qui fait plainte d’Amour en doit estre ignorant, Et n’a de sa nature aucune connoissance : De moy pour quelque orage ou malheur qui m’offanse, Jamais contre ce Dieu je ne vais murmurant. Se faut-il estonner si Phœbus en courant, Comme il est pres ou loin, des saisons fait muance ? Si Neptune en hyver est plein de violance ? Si froide est la gelée, et le feu devorant ? L’homme sage et constant qui en connoist la cause, Ne s’ébahit de voir l’effet en chaque chose, Et laisse tout passer d’un esprit arresté. Or la cause d’Amour n’est que peine et martire : Si donc cent mille ennuis en nos cœurs il retire, S’en faut-il estonner ? c’est sa proprieté.