Sonnet XXVII. — Amour en mesme instant m’aiguillonne et m’arreste

Amour en mesme instant m’aiguillonne et m’arreste, M’asseure et me fait peur, m’ard et me va glaçant, Me pourchasse et me fuit, me rend foible et puissant, Me fait victorieux et marche sur ma teste. Ores bas, ores haut, jouët de la tempeste, Il va comme il luy plaist ma navire élançant ; Je pense estre échappé quand je suis perissant, Et quand j’ay tout perdu je chante ma conqueste. De ce qui plus me plaist je reçoy déplaisir ; Voulant trouver mon cœur, j’égare mon désir, J’adore une beauté qui m’est toute contraire. Je m’empêtre aux filets dont je me veux garder, Et voyant en mon mal ce qui me peut aider, Las ! je l’approuve assez, mais je ne le puis faire.