Sonnet XXXII. — J’avoy fait mille efforts pour rompre une prison

J’avoy fait mille efforts pour rompre une prison, Où la seule fureur rangeoit ma fantaisie, Sans que le cours des ans, la peur, la jalousie Eussent peu dedans moy reloger la raison. Sentant au creux des os la brûlante poison, Dont mon ame insensée estoit toute saisie, Forcé je m’abandonne à cette frenaisie, N’esperant jamais plus d’y trouver guarison. Mais en fin de bon-heur je sçeu que ma maistresse Favorisoit un sot sans grace et sans addresse, Durant qu’elle s’en mocque et s’en rit avec moy. Lors un noble dédain vient gaigner mon courage, Qui m’affranchit du tout de l’amoureuse loy. Doy-je pas bien aimer le sot qui m’a fait sage ?