Sonnet XXXIII. — En pire estat ma fortune est venuë

En pire estat ma fortune est venuë, Ô tristes yeux, helas ! qu’elle n’estoit, Lors que le ciel, benin, vous permettoit Voir la beauté de moy tant reconnuë. Car si l’ardeur où mon ame est tenuë, S’en approchant, d’heure en heure augmentoit, Son œil piteux mon mal reconfortoit, Rendant ma vie en espoir maintenuë. Ô tans heureux ! quand je peu, la servant, Luy découvrir mes ennuis si souvant, Pleurer, crier, blasmer sa rigueur forte ! Las ! maintenant je languy sans confort, Et de la mort qu’absent d’elle je porte, Rien ne me peut delivrer que la mort.