Sonnet XXXV. — Fort sommeil de quatre ans, qui m’as sillé la veuë

Fort sommeil de quatre ans, qui m’as sillé la veuë, M’assoupissant du tout en la nuict des amours, Où est ce rare esprit ? où sont ces hauts discours ? Et cette grand’ beauté, qu’est-elle devenuë ? Or’ que la connoissance un peu m’est revenue, Je voy que le sujet de mes douloureux jours N’estoit rien que feintise et qu’impudiques tours D’une que pour mon bien trop tard j’ay reconnuë. Je rougis de ma honte et voy trop clairement Qu’Amour n’est point aveugle, ains les siens seulement, Puisqu’il leur vend du fard pour des beautez divines. Je t’embrasse, ô dédain ! fin de tous mes malheurs, Par toy je reconnoy qu’au lieu de belles fleurs Je cueilloy des chardons et des seiches espines.