Sonnet XXXVI. — Je connoy par essay que nostre esprit s’irrite

Je connoy par essay que nostre esprit s’irrite Et s’aigrit de fureur, quand il est empesché : Ainsi qu’un grand torrent, dont le cours est bouché, Contre l’empeschement s’obstine et se despite. Une Alcine impudique en tous charmes instruite, Par vengeance du ciel et pour quelque peché, En ses foibles liens me tenoit attaché, Bien qu’elle n’eust discours, ny beauté, ny merite. Par pitié seulement je l’aimoy quelque peu, En fin sans y penser mon cœur devint en feu, La voyant toute en proie à mainte amour nouvelle. Ce despit furieux m’a travaillé quatre ans, Essayant d’arrester ses pensers inconstans, Et n’en eusse fait cas s’elle eut esté fidelle.