Stances. — Amour guide ma plume et me donne l’adresse

Amour guide ma plume et me donne l’adresse, Pour vivement pourtraire une jeune deesse, Qui prend les deïtez aux filés de ses yeux, Qui rend les plus hautains sous son obeïssance, Estallant icy-bas par sa douce presance Ce qu’on voit de plus rare au cabinet des cieux. Angelique beauté, je sacre à la memoire Ces vers, avantureux courriers de vostre gloire, Qui n’atteindront pourtant au ciel de vostre honneur ; Pour aspirer si haut ma force est trop petite, Je sçay mon impuissance et vostre heureux merite, Et sçay qu’il vous faudroit un plus divin sonneur. Que le grand œil du ciel, quand il fait sa carriere, S’arreste à contempler et devant et derriere, En terre, au firmament, d’un et d’autre costé, Il dira qu’il ne voit tant de beautez ensemble, Que tout le plus parfait en vous seule s’assemble, Et mesme que vos yeux font honte à sa clarté. Celuy qui delibere et qui ferme s’obstine De ne loger jamais l’Amour en sa poitrine, Qu’il s’espreuve à vos yeux seulement une fois, Puis qu’il restive apres, s’il en a la puissance, Faisant comme devant à l’Amour resistance, Et ne reconnoissant son empire et ses loix ! Vous avez pour compagne une grace amiable, La chasteté vous suit doucement venerable, Et pourvoit que l’Amour ne vous fait soupirer ; L’attrayante rigueur, la grave courtoisie, Les beautez, les vertus, toutes vous ont choisie Et se font icy-bas en vous seule adorer. En ces tans si troublez, qui voit vos yeux reluire, Il peut dire qu’il voit, quand le jour se retire, La lune qui rayonne et fend l’air obscurcy ; Ou qu’il voit du soleil la lumiere enflammée, Quand il veut commencer sa course accoustumée, Et que l’eau de la mer le rend plus esclaircy. Le printans, gracieux mignon de la nature, Ne nous estalle point tant de riche peinture, Tant de roses, d’œillets et de lys blanchissans, Comme vos doux regards font naistre de fleurettes, D’agreables desirs, de douces amourettes, Et de hautains pensers qui nous font languissans. Telle qu’on voit Diane avec sa chaste suite, Quand aux cerfs plus legers elle donne la fuite, Ayant l’arc dans le poing et la trousse au costé ; Bien qu’elle ait à l’entour mille et mille pucelles, Elle apparoist tousjours sur toutes les plus belles, Et leurs perfections font lustre à sa beauté. Tout ainsi l’on vous voit à la cour apparoistre, Et parmy les beautez vostre beauté s’accroistre, Et rien qu’on puisse voir ne vous peut égaler ; Vos propos gracieux doutent le plus sauvage, Et vostre poil doré, c’est le plaisant feuillage Où les petits amours apprennent à voler. Les hauts monts de Savoye, où vous printes naissance, De vos fieres beautez donnent bien connoissance ; Ils sont tousjours remplis de neige et de froideur, Devant vostre blancheur toute neige s’efface ; Mais, helas ! vostre cœur est tout serré de glace, Et si de vostre froid vous causez une ardeur. Quand j’admire estonné tant de graces parfaites, Dont vous rendez si bien nos franchises sujettes, J’estime Amour heureux d’avoir les yeux bandez, Car, s’il avoit la veuë, il ne se pourroit faire Que de tant de beautez, libre, il se peust distraire, Et se prendroit luy-mesme aux laqs que vous tendez. Mais je m’amuse trop ; car, voulant entreprendre De pouvoir par mes vers vos vertus faire entendre, J’entreprends de conter les estoiles des cieux, Les feuilles que l’hyver fait tomber du boccage, Et les flots de la mer au tans d’un grand orage, Et d’Amour les dédains et les jeux gracieux.