Stances. — Lors que j’escry ces vers, il ne faut que l’on pense

Lors que j’escry ces vers, il ne faut que l’on pense, Que trop audacieux je n’aye connoissance, Du rang que vous tenez et de ma qualité : Car je jure vos yeux et leur puissance sainte Que je garde en cecy le respect et la crainte, Dont il faut reverer une divinité. Aussi tant de vertus vous font toute divine, Et vos douces beautez monstrent bien l’origine Que vous avez du ciel tout parfait et tout beau : Vous n’avez rien d’humain, vostre grace est celeste, Vos discours, vostre teint, vostre ris, vostre geste, Et l’Amour sans vos yeux n’auroit point de flambeau. J’en parle asseurement : car je connoy sa flame, Qui souloit prendre vie aux beaux yeux d’une dame, Et qu’il me fist sentir lors que j’en fu surpris : Las ! or’ à mon malheur je l’ay mieux reconnuë, Regardant folement les traits de votre veuë, Qui m’ont bien sçeu punir d’avoir trop entrepris. Or ne m’accusez point que je sois temeraire, Presumant vous aimer : car je ne sçauroy faire Qu’ailleurs tourne mon cœur, qui vous est destiné ; Et, quand ce seroit faute aux mortels d’entreprendre D’aimer une deesse, on ne m’en peut reprendre : Le peché fait par force est toujours pardonné. Las ! on peut bien juger que c’est une contrainte, Veu qu’au plus fort du mal dont mon ame est attainte, Je ne me puis garder de vous suivre en tous lieux, Et que, trouvant ma mort peinte en vostre visage, Mon triste desespoir, ma perte et mon dommage, Pour n’y connoistre rien, je me ferme les yeux. J’ay fait un fort rempart d’amour et de constance, Contre le desespoir armé de violance, Qui me fait mille assauts et ne me peut forcer : Quelquefois de furie il fait breche en mon ame ; Mais presqu’au mesme instant vostre beauté, madame, Accourant au secours, l’engarde de passer. Je voudroy bien pourtant qu’il demeurast le maistre ! Il combat mon salut, que je ne veux connoistre. Mais, las ! je me repen de l’avoir desiré ; Car, bien que ma douleur mortellement me blesse, Et que de mieux avoir je sois desesperé, J’aime mieux vivre ainsi qu’en toute autre liesse.