Stances. — Quand au matin le grand flambeau des cieux

Quand au matin le grand flambeau des cieux, Pere du jour, commence sa carriere, La nuit s’envole, et sa belle lumiere Mille thresors ouvre devant nos yeux. Quand au premier le flambeau de mon ame, Mon beau soleil à mes sens éclaira Tout bas desir de moy se retira, Ravi de voir les beautez de ma dame. Mais, comme on voit Phœbus en s’avançant Sur le midy plus de chaleur espandre, Les vens cesser et la terre se fandre Aux rais du chaud, nostre œil esblouyssant. Ainsi la flamme éprise en mon courage, Aux premiers jours blüettant doucemant, Est creüe en force et me va consumant, Troublant ma veuë au cours de mon voyage. Enfin la nuict, à son tour commandant, Par sa fraicheur esteint l’ardeur cuisante, Couvre de noir toute chose plaisante, Et le sommeil va sur nous respandant. Ainsi la mort, de ma flamme cruelle, Flamme d’Amour, la fureur esteindra ; Et pour jamais le sommeil me tiendra, Couvrant mes yeux d’une nuit éternelle.