Stances. — Quel secours faut-il plus que j’attende à ma paine

Quel secours faut-il plus que j’attende à ma paine, Si ce n’est par la mort, qui m’est toute certaine ? Puisque mes longs soupirs, ma foy, mon amitié, Le brasier de mon cœur, l’effroy de mon visage, Ne peuvent esmouvoir vostre obstiné courage, À se laisser toucher d’un seul trait de pitié ? Tantale aupres de moy bien-heureux se peut dire ! Son travail est petit : tout le bien qu’il desire, C’est d’avoir quelque pomme et sa soif estancher ; Où moy je brule, helas ! et mourant je pourchasse Un bien pour mon secours, qui tout autre surpasse, Mais qui croist le desir d’autant qu’il est plus cher. Ô que le feu d’Amour est d’estrange nature ! Mon cœur sans defaillir luy sert de nourriture, Je n’ay sang ny poulmon qui n’en soit consommé ; Mais, differant en tout de la commune flame, Encor que je vous touche, il n’esmeut point vostre ame, Et rien qui soit en vous n’en peut estre allumé. Je te despite, Amour, et maudy ton empire ! Que me sert qu’en mon cœur tous tes traits je retire ? Que me sert que le ciel m’ait à toy destiné ? Que me sert que jamais de moy tu ne t’envole, Si, tout remply de toy, je pers tans et parole Et ne puis amollir un courage obstiné ? Non, je n’auray jamais en vos yeux de fiance. Leurs regards sont trompeurs : par leur douce influance Et par des traits piteux ils me font esperer ; Je vous pense vaincuë et que mon mal vous touche, Mais, voulant l’essayer, un mot de vostre bouche, Ou vostre blanche main me contraint retirer. Belle et cruelle main, que vous m’estes mauvaise Je vous lave de pleurs, tout ravy je vous baise, Je sacre à vostre honneur mille vers amoureux, Du feu de mes soupirs j’eschauffe votre glace, Mais, rebelle tousjours, vous m’empeschez la place, Dont le trop de desir me rend si langoureux. Il faut faire autrement, puis que rien je n’avance Par tant de vains respects. Usons de violance ; Si la douceur n’y sert, gaignons là par assaut. Je le veux, mais en vain ; toute lasche et pesante, Ma vigueur s’affoiblist, mon ame est languissante, Et par trop de desir la puissance me faut. Seul but de mes desirs, ma celeste deesse, Helas ! voyez-vous point la fureur qui me presse ? J’aspire à l’impossible et fuy ce que je puis ; Un chaos amoureux dans mon ame s’assemble, Joye et dueil, mal et bien ; j’ose et brulant je tremble, Je ne sçay que je fay, je ne sçay que je suis. Fut-il jamais tyran si cruel que ma dame ? Par mille doux baisers elle attise ma flamme, Et se plaist de me voir peu à peu desseicher. Parmy ces privautez je l’esprouve inhumaine, Car la cruelle, helas ! me laisse à la fontaine, Sans souffrir que je boive et que j’ose y toucher. Que dira-t-on de moy, si l’on sçait ma simplesse ? Desportes tout un jour a tenu sa maistresse À part, sans compagnie, avec elle enfermé, Baisant ses beaux cheveux, ses yeux et son visage, Et n’osa, le couard, hazarder davantage : Dites qu’un tel amant est digne d’estre aimé !