Un dist de Nostre-Dame

De la très glorieuse Dame Qui est saluz de cors et d’ame Dirai, que tère ne m’en pui ; Mès l’en porroit avant .i. pui Espuisier c’on poïst retrère Combien la dame, est débonaire. Por ce si la devons requerre Qu’avant qu’elle chaïst sor terre Mist Diex en li humilité, Pitiez, dousors et charitez, Tant que ne sai où je commance : Besoignex sui par l’abondance. L’abondance de sa loance Remue mon corage et change. Si qu’esprouver ne me porroie, Tant parlasse je voudroie, Tant a en li de bien à dire Que trop est belle la matire : Se j’estoie bons escrivens Àinz seroie d’escrire vains Que je vous éusse conté La tierce part de sa bonté Ne la quarte ne redéisme. Se set chacuns par lui-méisme, Qui orroit comment elle proie Celi qui de son cors fist proie Por nous tous d’enfer despraer, C’onques ne vest le cors despraer, Ainz fu por nos praez et pris Dou feu de charité espris ; Et tot ce li ramantoit-elle, La très douce Virge débonaire : « Biaus filz, tu sais fame et home, Quant il orent mors en la pome, Il furent mort par le pechié : Dou maufez est toz entechiez ; En enfer il dui descendirent Et tuit cil qui d’eus issirent. Biaux chiers fis, il t’emprist pitiez Et tant lor montras d’amitiez Que por aus decendis ès ciaus : Li dessandres fu bons et biax. De ta fille féis ta mère ; Tiex fu la volanté dou père. De la crèche te fit-on coche ; Sans orguel est qui là se couche. Porter te covint en Égypte ; La demorance i fu petite, Car après toi ne vesqui gaires Tes anemis, li deputaires Hérodes, qui fist decoler Les inocens et afoler, Et desmembrer par chacuns membre, Si com l’Escriture remembre. Après ce revenis arrière : Jui refirent belle chière, Car tu lor montroies ou Temple Maint bel mot et maint bel example : Mout lor plot canques tu déis Juqu’à ce tens que tu féis Ladre venir de mort à vie ; Lors orent-il sor toi envie, Lors fus d’aus huiez et haïz, Lors fus enginiez et traïz Par les tiens et à aus bailliez. Lors fus penez et travillez, Et lors fus liez à l’estache ; N’est nus qui ne le croie et sache. Là fus batuz et déplaiez, Là fus de la mort esmaiez, Là te covint porter la croiz, Où tu crias à haute voiz Au Juis que tu soif avoies ; La soif estoit que tu savoies Tes amis mors et à malaise En la dolor d’enfer punaise. L’âme dou cors fu en Enfer Et brisa la porte d’enfer ; Tes amis tressis de léans ; Ainc ne remest clerc ne lai anz. Li cors remest en la croiz mis : Joseph, qui tant fu tes amis, A Pilate te demanda ; Li demanders mout l’amanda. « Lors fu ou sépucre posez. De ce fu hardiz et osez Pilate, qu’à toi garde mist, Car de folie s’entremist. Au tiers jors fu resuscitez : Lors fu et cors et déitez Ensamble sans corricion, Lors montas à l’Ascencion. « Au jor de Pentecouste droit, Droit à celle hore et à cel androit Que li apostre èrent assis A la table chacuns pencis, Lors envoias-tu à la table La toe grâce esperitable Dou Saint-Espérit emflamée, Que tant fu joïe et amée. Lors fus chacuns d’aus ci hardiz, Et par paroles et par diz, C’autant pris a mort comme vie : N’orent fors de t’amor envie. Biax chiers fiz, por humain lignage Jeter de honte et de domage Féist tote ceste bonté, Et plus assez que n’ai conté. S’or laissoies si esgaré Ce que si chier as comparé, Ci auroit trop grant mesprison ; S’or les lessoies en prison Entrer don tu les as osté, Car ci auroit trop mal hosté, Trop grant duel et trop grant martire, Biau filz, biau père, biau doz sire. » Ainsi recorde tote jor La doce Dame sans séjor : Jà ne fina de recorder ; Car bien nous voudroit racorder A li, don nos nos descordons De sa corde et de ses cordons. Or nous acordons à s’acorde. La Dame de miséricorde Et li prions que nous acort Par sa pitié au dine acort Son chier fil, le dine cor Dé : Lors si serons bien racordé.