Au Siege de la Raison

Chargé du desespoir, qui trouble ma pensée, Entre mille douleurs dont mon ame est pressée, Par la rigueur d’Amour, dans sa dure prison, Un jour, ne pouvant plus supporter ses alarmes, Ayant l’œil et le cœur gros d’ennuis et de larmes, Je le fay convertir au siege de Raison. Là je me presentay si changé de visage, Que, s’il n’eust eu le cœur d’une fere sauvage, Je pouvoy l’esmouvoir et le rendre adoucy ; Puis confus et tremblant, avec la contenance D’un pauvre criminel pres d’ouïr sa sentence, Parlant à la Raison, je me suis plaint ainsi : Royne, qui tiens en nous la divine partie, Qui nous conduits au ciel, lieu dont tu es sortie, A toy de ce cruel j’ose me lamanter, Afin qu’ayant ouy quelle est sa tyrannie, Et comme estrangement ses sujets il manie, Par ton juste support je m’en puis exanter. Sur l’avril gracieux de ma tendre jeunesse, Que j’ignorois encor que c’estoit de tristesse, Et que mon pié volloit quand et ma volonté ; Ce trompeur que tu vois, jaloux de ma franchise, Masquant de deux beaux yeux sa cruelle entreprise, Avec un doux accueil deçeut ma liberté. Mais qui se fust gardé de se laisser surprendre, Et qui de son bon gré ne se fust venu rendre, Voyant avecques luy tant de douces beautez ? Qui ne se fust promis un bien heureux voyage, Ayant la mer paisible, étant près du rivage, Et les petits zephyrs soufflans de tous costez ? Il se monstroit à moy sur tout autre amiable, Il ne me faisoit voir qu’un printans desirable ; Son visage estoit doux, doux estoient ses propos, Et l’œil qui receloit tous les traits de sa trousse Me perça l’estomach d’une façon si douce, Que j’estimoy ma peine un desiré repos. Mais il ne dura guere en ceste douce sorte, Car, si tost que mon cœur luy eut ouvert la porte, Et que mes sens craintifs eurent reçeu sa loy, Il dépoüilla soudain sa feinte couverture, M’enseignant mon erreur d’avoir fait ouverture Ainsi legerement à plus puissant que moy. Il troubla mon esprit d’une guerre immortelle, Il esmeut mes pensers, il les mit en querelle, Et fit, pour me laisser en eternel tourment, De mon cœur son fourneau, ses charbons de mes vaines, Mes poulmons ses souflets, de mes yeux ses fontaines, Qui sans jamais tarir, coulent incessamment. Il banit mes plaisirs et leur donna la fuitte, Dont le libre repos, que j’avois à ma suitte, M’abandonna soudain, de frayeur tout surpris ; Le travail print sa place, et la tristesse extrême, Les veilles, les soucis, le mespris de soy-mesme, Qui ne m’ont point lasché depuis que je fus pris. Je quitay tout soudain ce qui me souloit plaire, Ma façon se changea, je devins solitaire, Je portay bas les yeux, le visage et le front ; J’entretins mon desir d’une esperance vaine, Je discourus tout seul, et moy-mesme pris paine De nourrir les douleurs que deux beaux yeux me font. Je mourus dedans moi, pensant trouver ma vie Au cœur de la beauté qui me l’avoit ravie ; Mais depuis je n’ay peu, dont j’ay souffert la mort ; Et si je semble vif, ne croy pas à ta veuë : Par la seule douleur ce sorcier me remuë ; C’est de mon corps charmé l’invisible ressort. Il me fait voir assez de plus grandes merveilles, Tirant d’un froid rocher des flammes nompareilles, Dont il brûle mon cœur sans qu’il soit consumé, Me donnant pour repas le venin qui me tuë Et faisant que mon feu dedans l’eau continuë, Sans que pour tant de pleurs il soit moins allumé. Il croist de jour en jour sans espoir mon martyre, Il me fait voller haut sur des ailes de cire, Puis me fait trébucher quand je vay m’élevant. Il me rend si pensif, que je me trouve estrange, Et fait que ma couleur en plus palle se change, Seiche comme la fleur qui a senty le vant. Helas ! je change assez de teint et de visage ! Mais je ne puis changer cet obstiné courage, Qui me rend pour aimer tristement esperdu ; L’amoureuse poison tous mes sens ensorcelle, Et ce que j’ay du ciel, que mon esprit recelle, Est en pleurs et en cris pauvrement despendu. Soit de jour, soit de nuict, jamais je ne repose ; Je ronge mon esprit, je resve, je compose, J’enfante des pensers qui me vont devorant ; Quand le jour se depart, la clairté je desire ; Je souhaite la nuict lorsqu’elle se retire ; Puis, attendant le jour, je languis en mourant. Dès que l’aube apparoist, je me pers aux vallées, Et dans le plus epais des forests recelées, Pour, sans estre entendu, plaindre ma passion ; J’esmeu l’air et le ciel de ma douleur profonde, Et bref, en me lassant, je lasse tout le monde, Sans que cet inhumain en ait compassion. En ce lieu je my fin à mon triste langage ; Car mille gros soupirs, qui gardoient le passage Par où couloit ma voix, l’empeschoient de sortir ; Puis je trémissoy tout de voir mon adversaire Qui trepignoit des piés, qui bouilloit de cholere, Me menaçant tout bas d’un tardif repentir. Raison, disoit Amour, enten l’autre partie, Et ne conclus devant qu’estre bien advertie : Il faut balancer tout pour juger droitement. Doncques sans t’émouvoir par des plaintes si vaines, Escoute entierement l’histoire de ses paines, Et voy que cet ingrat m’accuse injustement. Ingrat est-il vrayment et sans reconnoissance, De me rendre à present si pauvre recompense Pour cent mille bien-faits qu’il a reçeus de moy ; J’ay purgé son esprit par ma divine flame, L’enlevant jusqu’au ciel et remplissant son ame D’amour, de beaux desirs, de constance et de foy. J’ay forcé son desir trop jeune et volontaire, Qui suit le plus souvent ce qui luy est contraire, Et contre son vouloir je l’ay favorisé ; D’un de mes plus beaux traits j’ay son ame entamée, J’ay fait luire en cent lieux sa vive renommée, Et des meilleurs esprits je l’ay rendu prisé. Je l’ay fait ennemy du tumulte des villes, J’ay repurgé son cœur d’affections serviles, Compagnon de ces dieux qui sont parmy les bois ; J’ay chassé loin de luy l’ardante convoitise, L’orgueil, l’ambition, l’envie et la feintise, Cruels bourreaux de ceux qui font la cour aux rois. J’ay fait par ses escrits admirer sa jeunesse, J’ay reveillé ses sens engourdis de paresse, Hautain et genereux je l’ay fait devenir ; Je l’ay separé loing des sentiers du vulgaire Et luy ay enseigné ce qu’il luy falloit faire Pour au mont de vertu seurement parvenir. Je luy ay fait dresser et la veuë et les ailes Au bien-heureux sejour des choses immortelles ; Je l’ay tenu captif pour le rendre plus franc. Or, si quelque douleur luy a livré la guerre, Hé ! qui sans passion pourroit vivre sur terre, Ayant des os, des nerfs, des poulmons et du sang ? L’invincible Thebain, nompareil en prouesse, Le preux fils de Thetis, lumiere de la Grece, Ajax, Agamemnon, peuvent mieux se douloir, Car je les ay rendus serfs de leurs prisonnieres Et leur ay fait aimer des simples chambrieres, Rabaissant leur orgueil par mon divin pouvoir. Où cestui qui se plaint de sa peine cruelle, Je le tiens sous le joug d’une deïté telle, Qu’il se doit estimer entre tous bien-heureux. Car de si grand’ beauté son amour j’ay fait naistre, Que moy, qui suis des dieux et des hommes le maistre, J’atteste mon pouvoir que j’en suis amoureux. Pense un petit, Raison, aux thresors desirables, Graces, beautez, douceurs et clartez admirables Que tu as veus là haut au cabinet des cieux ; Je ne sçay quoy de plus qui ne se peut bien dire, Reluit dedans ses yeux où je tiens mon empire, Car je n’ay peu choisir throsne plus precieux. Or de ses yeux divins naist sa peine obstinée, Dans eux sa liberté demeure emprisonnée, D’eux viennent les tourmens si fascheux à sentir ; Si c’est une prison, prisonniere est mon ame, Car je fay ma demeure aux beaux yeux de sa dame, Et si n’ay pas vouloir de jamais en sortir. Voila de ses pensers la grand’ troupe mutine, Voila les chauds soupirs qui brûlent sa poitrine, Voila l’ardant fourneau dont il est consommé, C’est de son triste cœur le sanglant sacrifice. « Mais qui, à l’homme ingrat, fait quelque benefice, Recueille mauvais fruit de ce qu’il a semé. » Ainsi parloit Amour avec grand’ violence ; Puis nous teusmes tous deux, attendant la sentence De Raison, qui vers nous son regard addressa : Vostre debat, dist-elle, est de chose si grande, Que pour le bien juger plus long terme il demande. Et, finis ces propos, en riant nous laissa.