Chanson. — Amour, grand vainqueur des vainqueurs

Amour, grand vainqueur des vainqueurs, Et la Beauté, royne des cœurs, Jadis firent un vœu notable ; Et, pour n’y manquer nullement, Chacun jura maint grand serment Qu’il le tiendroit irrevocable. Premier, cet enfant passager Jura de jamais ne loger, En esprit ou en fantasie, Sans exanter homme ni Dieu Qu’il n’y retint tousjours un lieu Près de soy, pour la Jalousie. Beauté, jurant apres Amour, Promit de ne faire sejour Ny d’arrester jamais en place, Sans y loger aussi soudain L’orgueil fantastique et hautain, L’aigreur, le mespris et l’audace. Sermens cruels et rigoureux, C’est par vous que les amoureux Sont pressez d’angoisses mortelles. L’un rend leur esprit transporté ; L’autre fait que la cruauté A tant de force au cœur des belles. De ces vœux trop bien observez, Nous avons esté reservez, O ma belle et chere Deesse ! Vos douces beautez et ma foy Sont du tout exempts de la loy, Et ne sentent point sa rudesse. Car, bien que la mesme beauté Ait en vous son siege arresté, Rien de fier ne vous deshonore : Vos yeux et vos propos sont doux ; Il est vray que ce n’est à tous, Mais à moy seul qui vous adore. Aussi, jaçoit que vos beaux yeux Puissent rendre, jusques aux cieux, Du plus grand Dieu l’ame saisie, Vostre foi m’a tant asseuré, Et leur feu si bien esclairé, Que je suis franc de jalousie. Puissions-nous vivre ainsi tousjours, Maistresse, heureux en nos amours, À qui nulle autre ne ressemble ; Et, s’il faut sentir du malheur, Que ce soit la seule douleur De n’estre pas tousjours ensemble.