Poème
Cilz qui a chois de prandre et departir
Cilz qui a chois de prandre et departir N’est pas saiges, s’il ne prant le meilleur. Pour ce voult Dieux le ciel prandre et choisir, Et la se tient com souverain seigneur : Aux hommes voult la terre de labeur Ça jus laissier, et se tint au plus hault. La li fait on, chascun jour, maint assault : Regniez est, maugriez et laidis, Et a telz gens dit, car d’eulx ne li chaut : Ja riches homs n’yra en paradis. Car riches veult les autres subvertir Et tout avoir ; prandre aux povres le leur, Trop convoitier, faire chascun martir, Sanz regarder n’a pitié n’a honeur, Sanz Dieu doubter, sanz raison, sanz couleur Que riches ait, qui le povre homme assault. Ainsi regner en ce monde lui fault, Par son pouoir, desur povre toudis, En esperant ce mot qui petit vault : Ja riches homs n’yra en paradis. Il soufist bien de ces joies sentir Mondainement, et qu’il tiengne en cremeur Les basses gens ; qu’il se face cremir, Qu’il ait argent, or, joyauls et la fleur Des richesces dont autres ont doleur. Qui ainsi fait, on le tient pour vassault, Mais, en la fin, leur faurra faire un sault Dont la mort fait tumer les plus hardis En l’infernal palut, par leur default : Ja riches homs n’ira en paradis. Princes, la part du ciel est la meilleur, Pour ce la prinst Nostre Sires jadis, Et la terre est aux hommes, la pieur. Ja riches homs n’yra en paradis.
Connectez-vous pour laisser un commentaire.