Poème
Mauditte soit condicion de chien
Mauditte soit condicion de chien Et de lion en homme de puissance ; Car destruit sont tuit li bon et li bien, Qui de ces deux a bien la congnoissance. Convoiteus est, envieux sanz doubtance, Chiens ; et lyons de sa propre figure Est orgueilleus et crueulx par nature. Qui ces quatre a, s’il est prince mondain, Met son honnour et terre en aventure, Pour estre tout perdu d’uy a demain. Car ou li chiens n’a defaulte de rien, Et qu’il est saoul, convoite il et s’avance D’autri mangier ravir, on le scet bien, Par l’envie qu’il a d’autri substance. Orgueilleus est lyons d’oultrecuidance, Et trescrueux ; toute beste queurt sure, Chascun le craint pour sa cruauté dure : Mais de l’aider l’a chascun en desdaing, S’il lui venoit une mesaventure, Pour estre tout perdu d’uy a demain. Princes, qui a ces .IIII., or le tien, N’est pas seigneur a qui on ait plaisance ; Car Convoitier, qui est vice ancien, Le fait hair ; Envie desavance Honnour en li ; son orgueil, sa bobance Le destruira : Cruauté li procure A ses subgiez haine et murmure, Et, en la fin, com le poisson a l’ain, Le lasse et prant a dolente pasture, Pour estre tout perdu d’uy a demain. Princes, qui tient ces poins de nourreture Ou de naiscent, si les delaisse a plain : Car c’est uns maulx et une pourreture, Pour estre tout perdu d’uy a demain.
Connectez-vous pour laisser un commentaire.