Poème
Dieux soit louez de ce bon temps
Dieux soit louez de ce bon temps, Et que chascuns a congnoissance De ses maulx ! Tuit sont repentens De vivre ou royaume de France Sanz paier ; c’est belle ordonnance : Le plat pais s’en sent ja bien, Car on n’y ose pillier rien ; Gens d’armes n’i sont plus doubté ; Mais au fort, qui y pert le sien, Chascuns dit que c’est grant pité. Nulz n’i va courre sur les champs, Ne n’y rançonne par puissance ; L’en n’y prant chevaulx ne jumens, Linges, draps, robes ne finance, Poulaille, moutons ; violence Ne s’i fait ; la n’abbaie chien, Coq n’y chante : le comun bien Y regne en grant auttorité ; La n’a Sarrazin ne paien : Chascuns dit que c’est grant pité. Plus ne se logent nulles gens Es eglises, par repentance ; L’en ne bat prevosts ne sergens ; Tuit rendent grant obeissance. On fait labeurs en habondance ; Honourez sont li ancien ; On quiert l’ostel Saint Julien : Il ne faut mais que charité. Tous ces poins a rebours retien : Chascuns dit que c’est grant pité. Princes, je voy les malfaisans, Les cuers plains de crudelité ; Quant on est de leurs maulx parlans, Chascuns dit que c’est grant pité.
Connectez-vous pour laisser un commentaire.