Poème
Qu’est Envie ? La mere de tristesce
Qu’est Envie ? La mere de tristesce, Cause de mort et de destruction D’ame et de corps, quant d’autrui bien se blesce, Qui ne lui puet faire impedicion. D’orgueil lui vient et de detraction, De cuer hautain, plein de courroux et d’ire, Qui fondre font, com fait au feu la cire, Quant amender voit nul cuer vertueus ; Ainsi languist, d’autrui bien a martire : Maudis de Dieu soit tous cuers envieus ! Car tel vice procede de paresce, De lascheté, de fole entencion, De pou de sens, d’avarice qui presse Le dolent cuer, quant il a passion D’autrui honeur ou de possession, Qui vouldroit bien sanz cause contredire ; Son corps seiche, qui ne fait que de frire Sanz bien avoir : ainsi li maleureus Va a sa fin ou ses pechiez le tire : Maudis de Dieu soit tous cuers envieus ! Et si est il, quant il a tel destroisse Que son ame met a dampnacion ; Se son penser et envie ne lesse, Ne puet avoir bonne conclusion. Ne cil sur qui il prant s’opinion N’en vault pas pis un grain d’orge, a voir dire. Qui saiges est en ces choses se mire, Et ne soit ja d’autrui bien dolereus, Dont ame et corps et renommée empire : Maudis de Dieu soit tous cuers envieus ! Prince, franc cuer, plains de haulte noblesce, Sur bien d’autrui ne sera convoiteus ; Mais li chetis d’autrui bien se courresce : Maudis de Dieu soit tous cuers envieus !
Connectez-vous pour laisser un commentaire.