De luy-mesme. — Le Gast, qui sous Brissac, nourriture avoit prise

Le Gast, qui sous Brissac, nourriture avoit prise, Et qui seul imita ses desseins genereux, Eut le cœur grand et beau, l’esprit avantureux, Pour luy du plus haut ciel basse estoit l’entreprise. En ce tans triste et feint il vescut sans feintise, N’estima les plus grands, mais les plus valeureux : D’argent il fit jonchée, et ne fut desireux Pour tout bien que de gloire ouvertement acquise. Il aida ses amis, ses ennemis chassa, Et tous ses compagnons en faveurs surpassa, Fut fidelle à son maistre et gaigna son courage. En fin, la nuict, au lict, foible et mal disposé, Se voit meurtrir de ceux qui n’eussent pas osé En plein jour seulement regarder son visage.