De luy-mesme. — Quelus avoit du ciel les beautez plus parfaites

Quelus avoit du ciel les beautez plus parfaites : Il n’estoit point humain, l’œil, le geste et le port L’accusoient pour un dieu. Croyons, puis qu’il est mort, Que les deïtez mesme au trespas sont sujettes. La fin de Sarpedon, de Memnon et d’Achille Jamais au cœur des dieux n’esmeut tant de douleurs : Phebus sur Hyacinthe espandit moins de pleurs, Et l’ennuy de son fils luy sembla plus facile. Au bruit de son trespas, soudain, Venus la belle Eschauffa tout le ciel de soupirs infinis, Renouvellant l’obseque et le dueil d’Adonis, Et pour mourir sur luy se souhaita mortelle. Diane aux noms divers, qui les forests habite, Encor que la pitié peu la puisse esmouvoir, Brisa son arc d’angoisse, estimant de revoir Le beau corps tout sanglant du trop chaste Hippolyte. Les Graces sans confort rompant leurs blondes tresses En semoient son tombeau, qui de lys blanchissoit ; La Jeunesse affligée à l’entour gemissoit, L’honneur, la Courtoisie et mille autres deesses. Et, bref, les deïtez furent toutes contraintes, En ce triste accident, de monstrer leur ennuy ; La beauté seulement ne fit lors point de plaintes, Car elle print naissance et mourut quand et luy.