De Remy Belleau

Ô qu’un grand reliquaire est clos en peu d’espace ! Viateur, prens-y garde : en ce lieu si sacré Avec un seul Belleau tu peux voir enterré Phœbus, Amour, Mercure et la plus chere Grace. J’avois creu jusqu’icy que la celeste race S’exemptoit du passage aux mortels preparé, Mais je voy par sa fin le contraire averé, Voyant mourir en luy tout le chœur de Parnasse. Jamais plus rare esprit d’un corps ne fut vestu ; Ce n’estoit que douceur, que sçavoir, que vertu, Dont mainte grand’ lumiere en terre estoit randuë. Maintenant d’un cercueil tous ces biens sont enclos : Non, je faux, le tombeau n’enserre que les os, Et par tout l’univers sa gloire est espanduë.