Regrets funèbres sur la mort de Diane V. — Comme on void parmy l’air un esclair radieux

Comme on void parmy l’air un esclair radieux Glisser subtilement et se perdre en la nuë, Ceste ame heureuse et sainte, aux mortels inconnuë, Coula d’un jeune cœur pour s’envoler aux cieux. Mon penser la suivit, au defaut de mes yeux, Jusqu’aux voûtes du ciel tout clair de sa venuë, Et voit qu’en tant de gloire où elle est retenuë, Elle a dueil que je sois encor en ces bas lieux. Mais tu n’y seras guere, ô deesse ! à m’attendre, Car je n’estois resté que pour cueillir ta cendre, Et ta memoire sainte orner comme je doy ; Maintenant que j’ay fait ce devoir pitoyable, Las de pleurer, de vivre et d’estre miserable, J’abandonne la terre et vole aupres de toy.