Secretaire des commandemens

Tout ce que la nature et le ciel favorable Pouvoient pour rendre un homme heureux parfaitement, L’Aubespine l’avoit, l’Aubespine, ornement De ce siecle maudit, ingrat et miserable. Il estoit grand et beau, dispos, jeune, amiable, Riche en biens, aux honneurs avancé justement, Pur, sans ambition, qui marchoit droitement, Tres-fidelle à son prince et aux bons secourable. Le ciel, qui l’avoit fait, craignant de l’offenser, Icy-bas longuement ne l’a voulu laisser Dans un pays de sang, de meurtres et de guerre ; Mais, amoureux de luy comme un pere tres-doux, En l’avril de sa vie il l’a cueilly de terre, Et en a fait un dieu qui aura soin de nous.