Sonnet II. — Ô bien-heureux esprits, nouveaux anges des cieux

Ô bien-heureux esprits, nouveaux anges des cieux, Le seul ardant desir de mon cœur miserable, Dont la memoire sainte est en moy si durable, Que tousjours je vous porte en l’esprit et aux yeux, Si de la vraye amour rien n’est victorieux, Et que nostre amitié n’en eut onc de semblable, Tournez vers moy la veuë et douce et favorable, Et ne m’abandonnez sans guide en ces bas lieux. Voyez-moy tout en pleurs sur vostre sepulture, Qui plains, non vostre mal, mais ma triste advanture, Laissé seul icy-bas, de miseres remply. N’endurez plus long-tans mon ame estre captive, Mais impetrez du ciel que bientost je vous suive, Puis que mon heur sans vous ne peut estre accomply.