Sonnet spirituel III. — Puis que le miel d’amour, si comblé d’amertume

Puis que le miel d’amour, si comblé d’amertume, N’altere plus mon cœur comme il fit autrefois ; Puis que du monde faux je mesprise les lois, Monstrons qu’un feu plus saint maintenant nous allume. Seigneur, d’un de tes cloux je veux faire ma plume, Mon encre de ton sang, mon papier de ta croix, Mon subject de ta gloire, et les chants de ma voix De ta mort, qui la mort éternelle consume. Le feu de ton amour, dans mon ame eslancé, Soit la sainte fureur dont je seray poussé, Et non d’un Apollon l’ombrageuse folie. Cet amour par la foy mon esprit ravira, Et, s’il te plaist, Seigneur, au ciel l’elevera Tout vif, comme sainct Paul ou le prophete Élie.