Sonnet spirituel V. — Seigneur, preste l’oreille aux soupirs douloureux

Seigneur, preste l’oreille aux soupirs douloureux D’un pecheur, qui sans toy de tout bien se desfie ; Que ton injuste mort son peché justifie, Et l’eleve par grace au lieu des bien-heureux. Loin, loin, bien loin de moy, venin trop dangereux De ce troupeau vanteur, qui tout en soy se fie ! Leur audace, ô Seigneur ! sans fin te crucifie, Avec plus de mespris que les juifs rigoureux. Sainct Pierre, avant ta prise, ainsi fier de soy-mesme, S’offre à mourir pour toy, brusle en ardeur extréme, Puis au moindre peril tout autre il se fait voir ; Et pour une servante il renonça son Maistre. Cet exemple, ô Seigneur ! assez nous fait cognoistre Combien sans ton secours foible est nostre pouvoir.