Sonnet spirituel VI. — Chargé de maladie et plus de mon offance

Chargé de maladie et plus de mon offance, Ô Seigneur ! tu me vois dans un lict perissant ; Ma vigueur diminue, et ma douleur croissant Fait chacun s’estonner de ma grand’ patiance. Continue, ô mon Dieu ! donne-moy la puissance De supporter ce mal, qui le corps va forçant, Et fay que mon esprit soit tousjours benissant, Au plus fort des douleurs, ta gloire et ta clemance. Donne de l’eau, Seigneur, à mes yeux espuisez, Pour rendre avec mes pleurs mes pechez arrosez, Et les lave en ton sang avant que je trespasse. Je ne demande point de vivre plus long-tans, Du monde et de ses jeux mes desirs sont contans ; Assez j’auray vescu si je meurs en ta grace.