Chanson. — Je ne veux jamais plus penser

Je ne veux jamais plus penser De voir un jour recompenser Le mal qu’en aimant je supporte, Puis que celle qui tient mon cœur Me monstre une extrême rigueur, Parmy l’amour qu’elle me porte. Mais pourroy-je esperer aussi Qu’elle eust jamais de moy mercy, Veu qu’à soy-mesme elle est cruelle, Se privant des plus doux plaisirs, Meurtrissant ses propres desirs Et perdant sa saison nouvelle ? Cruelle, où avez-vous les yeux ? Voyez ce printans gracieux ; Voyez ceste belle verdure, Un jour des prochaines chaleurs Fera languir toutes ces fleurs, Ores beautez de la nature. Si le tans leger et coulant Devore tout en s’envolant, S’il rend toute chose effacée, Est-ce pas trop de cruauté, De laisser perdre une beauté Si chere et si soudain passée ? Si c’est la peur qui vous retient, Pensez que la crainte ne vient Qu’à faute d’amitié parfaite. Amour est une vive ardeur, Et la crainte est une froideur, Soudain par vraye amour desfaite. Si ma foy vous fait differer, Qui vous en peut mieux asseurer Que vostre œil qui lit dans les ames ? Helas ! aimay-je ardantement ? Quand je parle à vous seulement, Il sort de ma bouche des flames. Si vous m’aimez, faites le voir, Sans plus mes douleurs decevoir, Les entretenant d’esperance ; Ou bien, si vous ne m’aimez pas, Ne retardez plus mon trespas ; Je le prendray pour recompense.